झापा । भद्रपुर भन्सार कार्यालयले आर्थिक वर्ष २०८२/८३ मा तोकिएको राजस्व सङ्कलनको लक्ष्य पूरा गर्न सकेन। कार्यालयले वार्षिक लक्ष्यको ७४ दशमलव ३४ प्रतिशत मात्रै राजस्व सङ्कलन गरेको हो।

भद्रपुर भन्सार कार्यालयका सूचना अधिकारी प्रेमबहादुर लामाका अनुसार आव २०८२/८३ का लागि कार्यालयलाई २५ करोड ३ लाख २५ हजार रुपैयाँ राजस्व सङ्कलन गर्ने लक्ष्य दिइएको थियो। तर, वर्षभरिमा १८ करोड ६० लाख ९५ हजार ८४४ रुपैयाँ मात्रै राजस्व सङ्कलन भएको छ।

यसअनुसार कार्यालय लक्ष्यभन्दा ६ करोड ४२ लाख २९ हजार १५६ रुपैयाँले पछाडि परेको छ।

भद्रपुर भन्सार कार्यालयले अघिल्लो आर्थिक वर्ष २०८१/८२ मा पनि राजस्व सङ्कलनको लक्ष्य पूरा गर्न सकेको थिएन।

उक्त आर्थिक वर्षमा कार्यालयलाई ३३ करोड १३ लाख ७३ हजार रुपैयाँ राजस्व सङ्कलन गर्ने लक्ष्य तोकिएको थियो। तर, २० करोड ८६ लाख ६९ हजार ६३१ रुपैयाँ मात्रै सङ्कलन भएको थियो।

अघिल्लो वर्षको तुलनामा गत आर्थिक वर्षमा कार्यालयको राजस्व सङ्कलन रकम केही घटेको देखिन्छ। लक्ष्यसमेत घटाइए पनि कार्यालयले तोकिएको लक्ष्य भेट्न सकेन।

सूचना अधिकारी लामाका अनुसार भद्रपुर नाकाबाट हाल निर्यात व्यापार नहुँदा राजस्व सङ्कलन प्रभावित भएको हो।

भद्रपुर नाकाबाट विशेषगरी सुर्तीजन्य पदार्थको आयात बढी हुने गरेको उनले बताए। आयातमा आधारित राजस्व सङ्कलन भए पनि निर्याततर्फको कारोबार नहुँदा भन्सारको समग्र व्यापारिक गतिविधि सीमित भएको कार्यालयको भनाइ छ।

झापाबाट हुने निर्यात व्यापारको ठूलो हिस्सा भने मेची भन्सार कार्यालयमार्फत हुँदै आएको छ। यस कारण भद्रपुर भन्सारको राजस्व सङ्कलनमा व्यापारको संरचना र नाकाबाट हुने कारोबारको प्रकृतिले समेत प्रभाव पारेको देखिन्छ।

लगातार दुई आर्थिक वर्ष राजस्व लक्ष्य पूरा गर्न नसकेपछि भद्रपुर भन्सार कार्यालयको राजस्व सङ्कलन बढाउन आयात–निर्यात कारोबार विस्तार तथा नाकाको व्यापारिक गतिविधि बढाउनुपर्ने चुनौती देखिएको छ।