काठमाडौं। बलिउड अभिनेत्री शिल्पा शेट्टीले पशुपतिनाथ मन्दिरको दर्शन गरेकी छन्। एक अन्तर्राष्ट्रिय कार्यक्रममा सहभागी हुन शुक्रबार काठमाडौं आएकी उनले पशुपतिनाथ पुगेर पूजाअर्चना गरेकी हुन्।

शेट्टी भारतको अग्रणी इभेन्ट तथा वेडिङ उद्योगसम्बन्धी संस्थाले पहिलोपटक नेपालमा आयोजना गरेको १३औँ ‘ईएमएएस ग्लोबल कन्भेन्सन एन्ड अवार्ड २०२६’ मा सहभागी हुन नेपाल आएकी हुन्।

साउन १५ देखि १७ गतेसम्म काठमाडौंस्थित द सोल्टीमा आयोजना भइरहेको सम्मेलनमा भारतसहित सात देशका करिब ५५० जना इभेन्ट व्यवस्थापक, वेडिङ प्लानर, पर्यटन व्यवसायी, लगानीकर्ता तथा आतिथ्य क्षेत्रका प्रतिनिधिहरू सहभागी छन्।

आयोजकले शिल्पा शेट्टीको सहभागिताले नेपालमा भइरहेको सम्मेलनलाई अन्तर्राष्ट्रिय आकर्षण थप्ने विश्वास लिएको छ। सम्मेलनमार्फत नेपाललाई लक्जरी वेडिङ, अन्तर्राष्ट्रिय सम्मेलन, कर्पोरेट इभेन्ट तथा प्रोत्साहन भ्रमण (इन्सेन्टिभ टुरिजम) का लागि आकर्षक गन्तव्यका रूपमा अन्तर्राष्ट्रिय बजारमा प्रवर्द्धन गर्ने लक्ष्य राखिएको छ।

सम्मेलनमा सहभागी विदेशी प्रतिनिधिहरूले काठमाडौंसँगै पोखरा, चितवन र जनकपुर समेत भ्रमण गर्ने कार्यक्रम छ। भ्रमणका क्रममा उनीहरूले नेपालको प्राकृतिक सौन्दर्य, सांस्कृतिक तथा धार्मिक सम्पदा, होटल तथा आतिथ्य सेवाको प्रत्यक्ष अनुभव गर्नेछन्।

आयोजक तथा पर्यटन व्यवसायीहरूले यसबाट नेपालमा भविष्यमा ठूला अन्तर्राष्ट्रिय कार्यक्रम, कर्पोरेट इभेन्ट तथा डेस्टिनेशन वेडिङ आयोजना गर्ने सम्भावना बढ्ने अपेक्षा गरेका छन्।

सम्मेलनमा शिल्पा शेट्टीका अतिरिक्त बलिउड अभिनेता शक्ति कपूर र विक्रान्त मेसी तथा नेपाली अभिनेत्री मनीषा कोइरालाको पनि सहभागिता रहनेछ।

चर्चित कलाकारहरूको उपस्थितिले सम्मेलनलाई थप चर्चामा ल्याउनुका साथै नेपाललाई अन्तर्राष्ट्रिय इभेन्ट तथा मनोरञ्जन उद्योगको गन्तव्यका रूपमा प्रस्तुत गर्न सहयोग पुग्ने आयोजकको विश्वास छ।

तस्वीरहरू: