काठमाडौं। नेपाल आयल निगमले बजारमा खाना पकाउने एलपी ग्यासको अभाव नरहेको स्पष्ट पारेको छ। दैनिक मागअनुसार ग्यासको आपूर्ति भइरहेको भए पनि बजारमा अभाव भएको भन्दै आएका समाचार तथा उपभोक्ताको गुनासोप्रति ध्यानाकर्षण भएको जनाएको छ।

निगमले ग्यासको आपूर्ति सहज बनाउन काठमाडौं उपत्यकामा थप व्यवस्था गरेको छ। उच्च मागलाई मध्यनजर गर्दै साउन १६ गते शनिबारदेखि टेकुस्थित निगमको कार्यालयबाट समेत ग्यास बिक्री वितरण सुरु गरिएको हो।

निगमका अनुसार बिहान ११ बजेदेखि बेलुकी ५ बजेसम्म सम्बन्धित उद्योगमार्फत नेपाल ग्यास, एचपी ग्यास, एभरेस्ट ग्यास, सुगम ग्यास र श्रीराम ग्यासका सिलिन्डर बिक्री गरिनेछ।

निगमले ग्यास उद्योगी तथा विक्रेतालाई बजारमा नियमित आपूर्ति कायम गर्न र घरायसी प्रयोजनका उपभोक्तालाई प्राथमिकतामा राखेर ग्यास वितरण गर्न निर्देशन दिएको छ। बिक्री व्यवस्थित बनाउन विक्रेताले खरिदकर्ताको नाम, ठेगाना र सम्पर्क नम्बरसमेत अभिलेख राख्नुपर्नेछ।

बजारमा ग्यास नपाएको अवस्थामा उपभोक्ताले कार्यालय समयभित्र निगमको हटलाइन नम्बर ०१–५९७१९०२ मा सम्पर्क गर्न सक्नेछन्।

निगमले एलपी ग्यासको आयात तथा बिक्री वितरण नियमित रहेको भन्दै उपभोक्तालाई अनावश्यक रूपमा ग्यास भण्डारण नगर्न र आवश्यकताअनुसार मात्र खरिद गर्न आग्रह गरेको छ।

यसअघि पनि बजारमा ग्यासको अभाव देखिएपछि निगमले माघ २८ गतेदेखि टेकुस्थित परिसरबाट ग्यास बिक्री गरेको थियो।

पश्चिम एसियामा द्वन्द्व बढेपछि आधा सिलिन्डर ग्यास वितरण सुरु गरिएसँगै बजारमा आपूर्ति सहज भएपछि टेकुबाट हुने बिक्री स्थगित गरिएको थियो।