काठमाडौं। पाकिस्तानको ब्रोड पिक क्षेत्रमा हिमपहिरोमा परी ज्यान गुमाएका नेपाली पर्वतारोही निर्मल पुर्जासहित अन्य आरोहीको शव उद्धारका लागि ग्राउन्ड टिम क्याम्प–१ तर्फ झर्ने तयारीमा जुटेको छ।

उद्धार अभियानमा संलग्न टोलीका अनुसार पहिलो चरणमा हिमपहिरोमा परेका आरोहीहरूको शवलाई सुरक्षित रूपमा क्याम्प–१ सम्म ल्याइनेछ। त्यसपछि मौसम र हिमाली अवस्थालाई ध्यानमा राख्दै सोमबार जापानी क्याम्पसम्म ल्याउने योजना बनाइएको छ।

जापानी क्याम्पसम्म शव ल्याउन सकिएमा त्यहाँबाट हेलिकप्टरमार्फत थप सुरक्षित स्थानमा स्थानान्तरण गर्ने तयारी छ। तर, हेलिकप्टर उद्धारका लागि मौसम र हिमालको अवस्था अनुकूल हुनुपर्नेछ।

उद्धार टोलीले प्रतिकूल भौगोलिक अवस्था र जोखिमका बाबजुद शवहरूलाई सुरक्षित रूपमा बाहिर ल्याएर सम्मानपूर्वक स्वदेश फर्काउने लक्ष्य राखेको जनाएको छ।

ब्रोड पिकमा गत बिहीबार साउन १४ गते मध्याह्नतिर गएको हिमपहिरोमा पुर्जासहित १० जना आरोही बेपत्ता भएका थिए। बेपत्तामध्ये ६ जना नेपाली पर्वतारोही रहेको बताइएको छ। पुर्जा टोलीका नेता थिए।

पुर्जाको मृत्यु भएको पुष्टि शनिबार मात्रै भएको थियो। त्यसपछि उनको शवसहित हिमपहिरोमा परेका अन्य आरोहीको उद्धारका लागि अभियान अघि बढाइएको हो।

पाकिस्तानको कराकोरम हिमशृङ्खलामा पर्ने ब्रोड पिक समुद्री सतहबाट ८ हजार ४७ मिटर उचाइमा रहेको विश्वका अग्ला हिमालमध्ये एक हो। उच्च उचाइ, हिमपहिरोको जोखिम र कठिन भौगोलिक अवस्थाका कारण उद्धार अभियान चुनौतीपूर्ण बनेको छ।

उद्धार टोलीले मौसममा सुधार आए अभियानलाई तीव्रता दिने तयारी गरेको छ। अहिले प्राथमिकता हिमपहिरोमा ज्यान गुमाएका आरोहीहरूको शव सुरक्षित रूपमा क्याम्प–१ सम्म ल्याउने र त्यसपछि थप सुरक्षित स्थानमा स्थानान्तरण गर्ने रहेको छ।