काठमाडौं। नेपाली कांग्रेसका सांसद नरेन्द्र केरुङले बजारमा खाना पकाउने ग्यासको अभाव देखिँदा सरकार र नेपाल आयल निगमको दाबीमाथि प्रश्न उठाएका छन्। सरकारले ग्यासको पर्याप्त मौज्दात रहेको र आपूर्ति नियमित भइरहेको बताइरहे पनि उपभोक्ताले सहज रूपमा ग्यास नपाएको भन्दै उनले वास्तविक अवस्था सार्वजनिक गर्न माग गरेका छन्।

प्रतिनिधिसभाको बैठकमा बोल्दै सांसद केरुङले सरकार र नेपाल आयल निगमले ग्यासको अभाव नरहेको दाबी गरिरहे पनि बजारमा उपभोक्ताले सिलिन्डर नपाइरहेको अवस्था विरोधाभासपूर्ण रहेको बताए।

उनले, ‘सरकार भन्छ ग्यास छ, आयल निगम पनि भन्छ आपूर्ति नियमित छ। तर उपभोक्ताले ग्यास पाएका छैनन्। त्यसो भए आपूर्ति भएको ग्यास कहाँ गयो?’ भन्दै सरकारसँग स्पष्ट जवाफ मागे।

केरुङले सरकारले आयात गरिएको र उपभोक्तासम्म वितरण गरिएको ग्यासको यथार्थ विवरण सार्वजनिक गर्नुपर्ने माग गरे। आपूर्ति र वितरणबीच ठूलो अन्तर देखिएको उल्लेख गर्दै उनले यो सरकारको वितरण प्रणाली कमजोर भएको प्रमाण भएको दाबी गरे।

भारतबाट हुने ग्यास आपूर्तिमा कुनै अवरोध आए त्यसको विकल्पबारे सरकारसँग स्पष्ट योजना नभएको पनि उनले आरोप लगाए। भारतमा निर्भर रहेको नेपालको ग्यास आपूर्तिमा समस्या उत्पन्न भए त्यसको व्यवस्थापन कसरी गरिन्छ भन्ने प्रश्न गर्दै उनले सरकारले पूर्वतयारी र आपत्कालीन योजना सार्वजनिक गर्नुपर्ने बताए।

व्यंग्यात्मक शैलीमा उनले, ‘भारतबाट ग्यास आउन बन्द भयो भने त्यसको परिपूर्ति कसरी हुन्छ? कि मन्दिरमा पूजा गर्दै घण्टी बजाउने पुजारी दाइले ल्याइदिने हो?’ भन्दै सरकारलाई कटाक्ष गरे।

सांसद केरुङले अत्यावश्यक उपभोग्य वस्तुको आपूर्ति र वितरणलाई प्रभावकारी बनाउन, कृत्रिम अभाव तथा कालोबजारी नियन्त्रण गर्न र उपभोक्ताले सहज रूपमा ग्यास पाउने व्यवस्था सुनिश्चित गर्न सरकारसँग माग गरेका छन्।