काठमाडौं । नेपाली कांग्रेसले सुकुम्बासी तथा अव्यवस्थित बसोबासी समस्या समाधानका लागि सरकारले सात दिनभित्र एकीकृत कार्ययोजना सार्वजनिक गर्न माग गरेको छ।

प्रतिनिधिसभामा बोल्दै कांग्रेस संसदीय दलका नेता भिष्मराज आङ्देम्बेले वास्तविक भूमिहीन, भूमिहीन दलित र अव्यवस्थित बसोबासीको पहिचान गरी सम्मानजनक पुनर्स्थापना गर्नुपर्ने बताए।

उनले सरकारले प्रत्येक १५ दिनमा प्रगति विवरण संसदीय समितिमा बुझाउनुपर्ने र समस्या समाधान नभएसम्म सदनलाई जानकारी गराउनुपर्ने माग गरे।

आङ्देम्बेले सार्वजनिक जग्गा, वन क्षेत्र र नदी किनार संरक्षण गर्नुपर्ने भए पनि वास्तविक भूमिहीन नागरिकलाई सुरक्षित आवासको व्यवस्था गर्नु राज्यको संवैधानिक दायित्व भएको बताए।

उनले भने, ‘गरिब नागरिकलाई एक ठाउँबाट अर्को ठाउँमा जबर्जस्ती सारेर समस्या समाधान हुँदैन, राज्यले समाधानको बाटो खोज्नुपर्छ।’