काठमाडौं । नेपाली कांग्रेसभित्र आन्तरिक असन्तुष्टि र नेतृत्वगत खिचातानी बढिरहेका बेला पार्टीका नेता चन्द्र भण्डारीले विभाजन रोक्न नेता-कार्यकर्तालाई अपिल गरेका छन्।

सामाजिक सञ्जालमार्फत धारणा सार्वजनिक गर्दै उनले संकटका बेला पुरानो पार्टीको आवश्यकता अझ बढी हुने भन्दै कांग्रेसलाई फुटबाट जोगाउनुपर्ने बताएका छन्। पार्टीमा कमजोरी भए त्यसलाई सुधार्दै अघि बढ्नुपर्ने उनको भनाइ छ।

भण्डारीले वर्षायाममा घर भत्काउँदा सबै भिज्ने र असिना पर्दा ज्यानसमेत जोखिममा पर्न सक्ने उदाहरण दिँदै आन्तरिक विवादका कारण पार्टी नै कमजोर पार्न नहुने संकेत गरेका छन्।

उनले कांग्रेसको इतिहास, संघर्ष र सहिदहरूको योगदान स्मरण गर्दै पार्टीको संरचना त्याग र बलिदानको जगमा बनेको उल्लेख गरेका छन्।

सत्तामा रहँदा कांग्रेसले कतिपय विषय बिर्सिएको स्वीकार गर्दै उनले विगतका कमजोरीबाट पाठ सिकेर पार्टीको मर्यादा जोगाउनुपर्नेमा जोड दिएका छन्।