काठमाडौं । नेपाली कांग्रेसका पूर्वसभापति शेरबहादुर देउवा समूहले आयोजना गर्न लागेको राष्ट्रिय भेलामा नेता डा. शेखर कोइराला पनि सहभागी हुने भएका छन्।

गगन थापा नेतृत्वको वर्तमान कार्यसमितिलाई अस्वीकार गर्दै देउवा समूहले यही २९ गते काठमाडौंमा राष्ट्रिय भेला आयोजना गर्न लागेको हो। कोइरालाका स्वकीय सचिव दिनेश थपलियाका अनुसार उक्त भेलामा डा. शेखर कोइराला सहभागी भएर सम्बोधनसमेत गर्नेछन्।

देउवा समूहको सम्पर्क कार्यालय चुनदेवीमा आयोजित यसअघिका कुनै पनि बैठकमा सहभागी नभएका कोइराला राष्ट्रिय भेलामा भने सहभागी हुन लागेका हुन्। पार्टीभित्र देखिएको आन्तरिक विवादमा कोइरालाले पछिल्लो समय मध्यमार्गी भूमिका निर्वाह गर्दै आएका छन्।

देउवा समूहले डा. शशांक कोइरालाको संयोजकत्वमा राष्ट्रिय भेला आयोजना गर्न लागेको हो। भेलालाई पूर्वसभापति शेरबहादुर देउवाले पनि सम्बोधन गर्ने कार्यक्रम तय भएको छ।

नेपाली कांग्रेसको आधिकारिकता विवादमा सर्वोच्च अदालतले पुनः सुनुवाइका लागि निस्सा दिएपछि देउवा समूह थप उत्साहित बनेको छ। अदालतले फैसला पुनरावलोकनका लागि बाटो खुला गरेपछि तत्कालका लागि पार्टी विभाजनको सम्भावना टरेको नेताहरूको बुझाइ छ। अब राष्ट्रिय भेलामार्फत पार्टीको आगामी रणनीति र नेतृत्वबारे देउवा समूहले आफ्नो धारणा सार्वजनिक गर्ने तयारी गरेको छ।