काठमाडौं। नेपाली कांग्रेसका पूर्वसभापति शेरबहादुर देउवा समूहले काठमाडौंमा साउन २९ देखि ३१ गतेसम्म आयोजना हुने भनिएको राष्ट्रिय भेला स्थगित नभएको स्पष्ट पारेको छ।

भेला स्थगित भएको भन्दै आयोजक समितिका संयोजक डा. शशांक कोइरालाको नाममा सामाजिक सञ्जालमा विज्ञप्ति भाइरल भएपछि देउवा समूहले त्यसको खण्डन गरेको हो।

देउवा समूहका प्रचार विभाग प्रमुख मीन विश्वकर्माले निर्धारित मितिमै भेला हुने भन्दै कुनै पनि भ्रममा नपर्न आग्रह गरेका छन्। उनका अनुसार भेलाको तयारी तीव्र रूपमा भइरहेको छ र कार्यक्रम तोकिएकै समयमा सञ्चालन हुनेछ।

विश्वकर्माले प्रा. डा. शशांक कोइरालाको नेतृत्व, शीर्ष नेताहरूको समर्थन, सभापति शेरबहादुर देउवाको स्वदेश आगमन तथा भेलालाई सम्बोधन गर्ने कार्यक्रम तय भइसकेको उल्लेख गरेका छन्।

उनले सर्वोच्च अदालतले कांग्रेसको विवरण अद्यावधिकसम्बन्धी मुद्दामा पुनरावलोकनको अनुमति दिएको विषयलाई समेत जोड्दै भेलाबारे भ्रम फैलाउने काम भएको दाबी गरेका छन्।

‘प्रा.डा. शशांक कोइरालाको नेतृत्व, शीर्ष नेताहरूको समर्थन, सभापति शेरबहादुर देउवाको स्वदेश आगमन र भेलालाई सम्बोधन गर्नुहुने तथा अदालतबाट मुद्दाको पुनरावलोकन गर्ने आदेश (अनुमति) समेत आइसकेपछि डराएको हताश मनस्थितिको उपजको रूपमा कार्यक्रमबारे जथाभाबी लेखेका हुन्,’ उनले भनेका छन्।

संयोजक कोइरालाको किर्ते हस्ताक्षरसमेत प्रयोग गरेर तथाकथित विज्ञप्ति जारी गरिएको भन्दै उनले आपत्ति जनाएका छन्।

विश्वकर्माले भेलालाई रोक्न खोज्नेहरूले भ्रम फैलाएको हुनसक्ने दाबी गर्दै कार्यक्रम कुनै हालतमा नरोकिने बताएका छन्।

उनले भने, ‘नक्कली विज्ञप्ति निकालेर भ्रम फैलाइएको छ। तोकिएकै समयमा हाम्रो कार्यक्रम हुन्छ। यो भेलालाई रोक्न खोज्नेहरूले भ्रम फैलाएको हुनसक्छ। मैले हाम्रो आधिकारिक कुरा फेसबुकबाट जानकारी गराइसकेको छु।’

भेलामा देउवा पक्षका नेता-कार्यकर्ताको सहभागिता रहने आयोजकले जनाएको छ।