काठमाडौं । प्रतिनिधिसभाको बैठकमा आज पनि विपक्षी दलहरूले विरोध जनाएका छन्। बैठक सुरु हुनेबित्तिकै विपक्षी सांसदहरू उठेर विरोध जनाएपछि सदनको वातावरण केही समय तनावपूर्ण बनेको थियो।

विपक्षी दलहरूले प्रधानमन्त्री बालेन्द्र शाह ‘बालेन’ले गत जेठ १७ गते दिएको सीमासम्बन्धी विवादास्पद अभिव्यक्तिलाई लिएर निरन्तर आपत्ति जनाउँदै आएका छन्। प्रधानमन्त्रीको उक्त अभिव्यक्तिले नेपालको राष्ट्रिय हित, सीमा र सार्वभौमिकतासँग जोडिएको संवेदनशील विषयमा प्रश्न उठाएको भन्दै विपक्षी दलहरूले प्रधानमन्त्रीले संसद्मा स्पष्ट जवाफ दिनुपर्ने र सार्वजनिक रूपमा माफी माग्नुपर्ने माग गर्दै आएका हुन्।

आजको बैठकमा पनि विपक्षी सांसदहरूले सोही विषयलाई लिएर विरोध जनाएका थिए। बैठक सुरु भएलगत्तै विपक्षी दलका सांसदहरू उठेपछि सभामुखले सदन सञ्चालनका लागि सहयोग गर्न आग्रह गरेका थिए। तर, विपक्षी सांसदहरूले आफ्नो माग सम्बोधन नभएसम्म विरोध जारी राख्ने संकेत गरेका छन्।

विपक्षी दलहरूको तर्फबाट बोल्दै नेपाली कांग्रेसका सांसद भरतकुमार स्वाँरले प्रधानमन्त्री बालेन्द्र शाहले सीमासम्बन्धी विवादास्पद अभिव्यक्तिका लागि माफी माग्नुपर्ने बताए। उनले प्रधानमन्त्रीजस्तो जिम्मेवार पदमा रहेका व्यक्तिबाट राष्ट्रिय सीमा र सार्वभौमिकतासँग सम्बन्धित विषयमा गैरजिम्मेवार अभिव्यक्ति आउनु गम्भीर विषय भएको बताए।

स्वाँरले प्रधानमन्त्रीले दिएको अभिव्यक्तिबारे संसद्मा स्पष्ट पार्नुपर्ने र त्यसप्रति आफ्नो धारणा सार्वजनिक गर्नुपर्ने माग गरे। राष्ट्रियता, सीमा र सार्वभौमिकतासँग जोडिएका विषयमा राजनीतिक आग्रह–पूर्वाग्रहभन्दा माथि उठेर जिम्मेवार ढंगले प्रस्तुत हुनुपर्ने उनको भनाइ थियो।

प्रधानमन्त्री बालेनको जेठ १७ गतेको अभिव्यक्तिलाई लिएर यसअघि पनि प्रतिनिधिसभामा विपक्षी दलहरूले लगातार आवाज उठाउँदै आएका छन्। विपक्षी दलहरूले प्रधानमन्त्रीले संसद्मा उपस्थित भएर जवाफ दिनुपर्ने तथा विवादास्पद अभिव्यक्ति सच्याउनुपर्ने माग गर्दै आएका छन्।