काठमाडौं। काठमाडौंमा जारी नेपाली कांग्रेस इतर समूहको राष्ट्रिय भेलामा सहभागीका लागि तीन दिनमा ३ हजार ६ सय किलो मासु खपत हुने भएको छ।

भेलामा सहभागीको खाना व्यवस्थापनका लागि दैनिक ४ सय किलो मटन र ८ सय किलो चिकेन पकाउने तयारी गरिएको हो।

राष्ट्रिय भेलामा सहभागीका लागि खाना तथा नास्ताको व्यवस्थापन ओम साइ क्याटरिङ एन्ड पार्टी प्यालेसले गरेको छ। क्याटरिङका अनुसार साउन २९, ३० र ३१ गते गरी तीन दिनसम्म दैनिक करिब ८ हजार जनाका लागि खाना तथा नास्ताको व्यवस्था गरिएको छ।

यसअनुसार तीन दिनमा कुल २४ हजार जनाका लागि खाना व्यवस्थापन गरिनेछ। सहभागीको सङ्ख्यालाई ध्यानमा राख्दै बिहानको नास्तादेखि मुख्य खानासम्मको मेनु तयार पारिएको क्याटरिङले जनाएको छ।

क्याटरिङले उपलब्ध गराएको विवरणअनुसार खाना तथा नास्ताका लागि प्रतिव्यक्ति ७ सय ८५ रुपैयाँ खर्च हुने तय गरिएको छ। उक्त दरमा मूल्य अभिवृद्धि कर (भ्याट) समावेश गरिएको छैन।

भेलाका सहभागीका लागि बिहानको नास्तामा कालो चिया, ब्ल्याक कफी, पुरी र तरकारी राखिएको छ। मुख्य खानामा भने विभिन्न परिकार समावेश गरिएको छ।

मुख्य खानाको मेनुमा प्लेन पुलाउ, भटौरे रोटी, चिकेन रोष्ट, दाल फ्राई, ग्रिन सलाद, मटन करी, मिक्स भेज, पापड, टमाटरको अचार तथा केराउ–मुला–गाजरको मिश्रित अचार राखिएको छ। सहभागीका लागि खानेपानीको समेत व्यवस्था गरिएको छ।

दैनिक ४ सय किलो मटन र ८ सय किलो चिकेनका दरले तीन दिनमा १ हजार २ सय किलो मटन र २ हजार ४ सय किलो चिकेन खपत हुने देखिन्छ। यसरी भेलामा तीन दिनमा कुल ३ हजार ६ सय किलो मासु प्रयोग हुने भएको हो।

ठूलो सङ्ख्यामा सहभागी हुने भएकाले खाना पकाउने, वितरण गर्ने तथा नास्ताको व्यवस्थापनका लागि क्याटरिङले आवश्यक जनशक्ति र पूर्वतयारी मिलाएको जनाएको छ।

भेलामा सहभागीको सङ्ख्याअनुसार दैनिक खाना तथा नास्ता व्यवस्थापन गरिने बताइएको छ।