काठमाडाैं। नेपाली कांग्रेसका नेता डा. शशांक कोइरालाले वालेन्द्र शाह (बालेन) नेतृत्वको वर्तमान सरकार काम चलाउ सरकार भएको बताएका छन्। 

शनिबार काठमाडौंमा कांग्रेसको संस्थापन इतर पक्षको राष्ट्रिय भेलाका क्रममा नेपालवान एचडीसँग कुराकानी गर्दै नेता कोइरालाले सरकारसँग कुनै नयाँपन नभएको बताए। बहुमतको समर्थन प्राप्त भए पनि सरकारले हालसम्म कुनै नयाँ नीति तथा कार्यक्रम ल्याउन नसकेको उनको भनाइ थियो। 

‘यो मलाई लाग्छ, साधारण सरकार हो। उनीहरूको बहुमत त छ, तर कुनै ठोस कुनै राम्रो काम गरेको मलाई लाग्दैन,’ उनले भने। 

राष्ट्रिय स्वतन्त्र पार्टी (रास्वपा) वरिष्ठ नेता वालेन्द्र शाहको सरकारका कामचलाउ भएको टिप्पणी गरे। ‘नयाँ कुनै नीतिहरू त ल्याएको छैन, उनीहरूले। खाली यो कामचलाउ सरकार भनौं न,’ डा. कोइरालाले भने। 

 यो पाँच वर्ष टिक्ला कि मध्यावधिमा जाने सम्भावना रहन्छ भन्ने प्रश्नमा डा. कोइरालाले भने, ‘सम्भावना त किन रहँदैन, भइहाल्छ नि।’

डा. कोइरालाकै नेतृत्वमा राष्ट्रिय भेला आयोजना गरिएको हो। शुक्रबार सुरु भएको भेला आइतबारसम्म चल्नेछ।