काठमाडौं। नेपाली कांग्रेसभित्र नेतृत्व र महाधिवेशनलाई लिएर देखिएको विवाद झन् जटिल बन्दै गएको छ।

पार्टीका दुई धारबाट छुट्टाछुट्टै गतिविधि भइरहेका बेला पूर्वमहामन्त्री डा. शशांक कोइराला भने विभाजनभन्दा सहमतिको बाटो खोज्न सक्रिय देखिएका छन्।

कांग्रेसमा विशेष महाधिवेशनपछि गगन थापा नेतृत्वको नयाँ कार्यसमिति सक्रिय छ। अर्कोतर्फ, तत्कालीन संस्थापन पक्षले विशेष महाधिवेशनको वैधानिकतामाथि प्रश्न उठाउँदै अलग गतिविधि अघि बढाइरहेको छ।

विवाद अदालतसम्म पुगेपछि पार्टीभित्रको शक्ति संघर्ष थप पेचिलो बनेको हो।

यसैबीच निवर्तमान सभापति शेरबहादुर देउवा स्वदेश फर्किएपछि इतर समूह पनि सक्रिय भएको छ। उक्त समूहले राष्ट्रिय सम्मेलन गर्दै १५औँ महाधिवेशनसहित विभिन्न विषयमा प्रस्ताव अघि सारेको छ।

यस्तो अवस्थामा डा. शशांक कोइरालाले सबै पक्षलाई संवादमा ल्याएर पार्टीलाई एकढिक्का बनाउने प्रयास थालेका छन्। उनको प्राथमिकता कुनै एउटा पक्षलाई जिताउनेभन्दा कांग्रेसको संस्थागत एकता कायम गर्नु देखिन्छ।

शशांकले युवा पुस्तालाई पनि साथमा लिएर अघि बढ्नुपर्ने धारणा राख्दै आएका छन्। गगन थापा र विश्वप्रकाश शर्मालगायतका नेताबिनाको कांग्रेस बलियो बन्न नसक्ने उनको बुझाइ छ।

उनले पार्टीभित्रको विवाद समाधानका लागि सम्बन्धित पक्षसँग संवाद गरिरहेको र निर्वाचन आयोग तथा पार्टी नेतृत्वसँग समेत पहल थालेको बताएका छन्।

कांग्रेसलाई एकताबद्ध बनाउने शशांकको योजनाको सबैभन्दा कठिन पक्ष भनेको देउवा र गगन थापा पक्षबीच सहमति जुटाउनु हो। दुवै पक्ष आ-आफ्नो राजनीतिक तथा संगठनात्मक दाबीमा रहेकाले बीचको बाटो निकाल्न सहज छैन।

विवाद समाधानका लागि दुवै पक्षका संरचनालाई समेटेर नयाँ तयारी समिति बनाउने, सबै धारको प्रतिनिधित्व सुनिश्चित गर्ने र सहमतिका आधारमा एकताको महाधिवेशन गराउने विकल्पमा छलफल भइरहेको बताइएको छ।

यसले अदालतको विवादलाई पनि राजनीतिक सहमतिबाट निकास दिन सकिने सम्भावना खोजिरहेको देखिन्छ।

शशांक स्वयं सभापतिको आकांक्षी भए पनि उनले आफ्नो व्यक्तिगत राजनीतिक लक्ष्यभन्दा पार्टी एकतालाई प्राथमिकता दिने संकेत गरेका छन्। डा. शेखर कोइराला सभापतिमा अघि बढे सहयोग गर्ने र गगन थापाले सबै पक्षलाई सम्मानजनक स्थान दिने स्पष्ट योजना ल्याए आफू सहकार्यका लागि तयार रहने उनको धारणा छ।

यसबाट शशांक अहिले कांग्रेसभित्र निर्णायक ‘मध्यस्थ’को भूमिका स्थापित गर्न खोजिरहेको देखिन्छ।

बीपी कोइरालाको मेलमिलापको राजनीतिक विरासत बोकेको परिवारका सदस्य शशांकले अहिले पार्टीभित्र पनि त्यही भावनाको प्रयोग गर्न खोजेको देखिन्छ।

उनको सन्देश व्यक्तिगत जित–हारभन्दा पार्टीको दीर्घकालीन भविष्य महत्वपूर्ण भन्ने छ।

कांग्रेसमा अहिले दुई धारबीचको दूरी बढिरहेका बेला शशांकको एकता अभियान कति प्रभावकारी हुन्छ भन्ने आगामी दिनमा स्पष्ट हुनेछ।