काठमाडौं। नेकपा एमालेका महासचिव शंकर पोखरेलले प्रतिनिधिसभाका सभामुख र उपसभामुखको भूमिकामाथि प्रश्न उठाउँदै संवैधानिक मर्यादा र संसदीय अभ्यासअनुसार तटस्थता कायम गर्नुपर्ने बताएका छन्।

सामाजिक सञ्जालमार्फत धारणा सार्वजनिक गर्दै पोखरेलले निर्वाचित भएपछि सभामुख र उपसभामुखले दलगत स्वार्थभन्दा माथि उठेर भूमिका निर्वाह गर्नुपर्ने बताएका हुन्।

उनका अनुसार सभामुखको भूमिकालाई लिएर पछिल्लो समय विभिन्न प्रश्न उठिरहेका छन्। सभामुखले आफ्नो भूमिकामा सुधारको प्रयास गरेको देखिए पनि उपसभामुखको भूमिकामा समेत समस्या देखिएको पोखरेलको टिप्पणी छ।

पोखरेलले उपसभामुख श्रम संस्कृति पार्टीबाट समानुपातिकतर्फ निर्वाचित भए पनि पदमा पुगेपछि कुनै दलको पक्ष वा विपक्षमा नरही निष्पक्ष भूमिका निर्वाह गर्नुपर्ने बताएका छन्। दलबाट निर्वाचित भए पनि सभामुख र उपसभामुखको पदमा पुगेपछि संसदीय जिम्मेवारीलाई प्राथमिकता दिनुपर्ने उनको भनाइ छ।

उनले उपसभामुखले सत्तापक्षलाई सहयोग पुग्ने गरी भूमिका निर्वाह गर्नु संवैधानिक व्यवस्था र संसदीय प्रणालीको मर्मसँग मेल नखाने तर्क गरेका छन्।

पोखरेलले अनुभवको कमीका कारण पदीय मर्यादा र संविधानको भावनाअनुकूल आचरणमा केही कमजोरी भएको हुनसक्ने भन्दै उपसभामुखले आगामी दिनमा आफ्नो भूमिकामा सुधार गर्नुपर्ने सुझाव दिएका छन्।

उनले सभामुख र उपसभामुख दुवैले आफू निर्वाचित भएको दलभन्दा माथि उठेर संसद्को निष्पक्ष सञ्चालनमा केन्द्रित हुनुपर्ने संकेत गरेका छन्।