काठमाडौं । राष्ट्रिय स्वतन्त्र पार्टीकी सांसद रञ्जु दर्शनाले यौन हिंसा न्यूनीकरणका लागि विद्यालय शिक्षादेखि अनुसन्धान प्रणालीसम्म सुधार गर्न सरकारको ध्यानाकर्षण गराएकी छन् ।

प्रतिनिधिसभाको बैठकमा गरिमा चौधरीमाथिको बलात्कार घटनाको प्रसंग उठाउँदै दर्शनाले कक्षा १ देखि १२ सम्म उमेरअनुकूल समग्र यौनशिक्षा अनिवार्य रूपमा लागू गर्नुपर्ने बताइन् ।

आफू सांसदका रूपमा मात्रै नभई आमाको जिम्मेवारीसमेत सम्झेर विषय उठाइरहेको बताउँदै उनले गरिमा चौधरीको परिवारलाई न्याय दिलाउन सरकारले चालेका कदमप्रति धन्यवाद दिइन् ।

दर्शनाले विद्यालयको पाठ्यक्रममा यौन तथा प्रजनन स्वास्थ्यसँग सम्बन्धित विषयलाई व्यवस्थित रूपमा समावेश गर्नुपर्ने बताइन् । समाजमा यौनशिक्षाको कुरा गर्दा नै असहज मान्ने प्रवृत्ति रहेकाले त्यसलाई परिवर्तन गर्नुपर्ने उनको भनाइ थियो ।

उनले यौन हिंसाका घटनाको अनुसन्धानलाई प्रभावकारी बनाउन देशको फरेन्सिक क्षमता विस्तार गर्नुपर्ने अर्को माग राखिन् । घटनास्थलमा पुग्ने प्रहरीलाई प्रमाण सुरक्षित राख्ने, संकलन गर्ने र प्रारम्भिक अनुसन्धान गर्ने विषयमा आवश्यक तालिम तथा दक्षता प्रदान गर्नुपर्ने उनले बताइन् ।

महिला तथा बालिकामाथिको हिंसालाई केवल अपराध र कानुनी कारबाहीको विषयका रूपमा मात्र हेर्न नहुने दर्शनाको भनाइ छ । सञ्चारमाध्यम, विज्ञापन, कथा तथा चलचित्रमा महिलालाई यौन वस्तुका रूपमा प्रस्तुत गर्ने प्रवृत्तिले पनि समाजको सोच निर्माणमा असर पार्ने उनले टिप्पणी गरिन् ।