काठमाडौं। काठमाडौं उपत्यकाका स्थानीय तहका प्रमुख तथा उपप्रमुखहरूको साझा संस्था काठमाडौं उपत्यका मेयर्स फोरमले प्रधानमन्त्री वालेन्द्र शाह(बालेन)लाई भेटेर उपत्यकाको फोहोर व्यवस्थापनसहितका समसामयिक विषयमा ध्यानाकर्षण गराउने भएको छ ।

फोरमको मंगलबार बसेको आकस्मिक बैठकले प्रधानमन्त्रीसँग जतिसक्दो छिटो भेटका लागि समय माग्ने निर्णय गरेको हो । भेटमा उपत्यकाको फोहोर व्यवस्थापन, सडक बत्तीको शुल्क, स्थानीय तहले प्रयोग गरिरहेका जग्गाको भोगाधिकार र फोहोर व्यवस्थापनका लागि आवश्यक जग्गाको व्यवस्थालगायत विषय उठाउने फोरमको तयारी छ ।

बैठकले भदौ ५ गते सिंहदरबारमा भएको फोहोर व्यवस्थापनसम्बन्धी छलफलमा फोरमका पदाधिकारी तथा सदस्यहरूमाथि सांसद आशिका तामाङबाट भएको व्यवहारप्रति समेत आपत्ति जनाएको छ । उक्त विषयमा पनि प्रधानमन्त्रीको ध्यानाकर्षण गराउने निर्णय भएको फोरमले जनाएको छ ।

उपत्यकाको फोहोर व्यवस्थापनको विषयमा प्रधानमन्त्री शाह काठमाडौं महानगरपालिकाको प्रमुख रहँदादेखि नै फोरमसँग छलफल हुँदै आएको थियो ।

फोरमका अनुसार तत्कालीन सरकार र नेप बेस्टबीच भएको सम्झौता कार्यान्वयन गर्ने वा सम्झौता खारेज गरेर फोहोर व्यवस्थापनका लागि अर्को विकल्प खोज्ने विषयमा पटक–पटक छलफल भएको छ ।

तर फोहोर व्यवस्थापनको समस्या भने अझै दीर्घकालीन रूपमा समाधान हुन सकेको छैन ।

फोरमले उपत्यकाको फोहोर व्यवस्थापन कुनै एक तहको सरकारको मात्र जिम्मेवारी नभई संघ, प्रदेश र स्थानीय तह सबैको साझा सरोकारको विषय भएको जनाएको छ ।

फोहोर व्यवस्थापनका लागि आवश्यक जग्गा, पूर्वाधार तथा अन्य व्यवस्थापनका विषयमा संघीय सरकारसँग समन्वय आवश्यक रहेको फोरमको निष्कर्ष छ ।

दीर्घकालीन रूपमा फोहोर व्यवस्थापनको समस्या समाधान गर्न तीनै तहका सरकारबीच प्रभावकारी समन्वय हुनुपर्नेमा जोड दिँदै फोरमले प्रधानमन्त्रीसँगको भेटमा यही विषयलाई प्राथमिकताका साथ उठाउने तयारी गरेको छ ।