काठमाडौं । नेपाली कांग्रेसका सभापति गगनकुमार थापाले रसुवामा आएको अप्रत्याशित तथा भीषण बाढीका कारण अवस्था गम्भीर बनेको बताएका छन्।

सामाजिक सञ्जालमार्फत सभापति थापाले विपद्को यो अवस्थामा राज्यको सम्पूर्ण संयन्त्र परिचालन गरी उद्धार र राहतमा केन्द्रित हुन सरकारलाई आग्रह गरेका छन्।

उनले संघ, प्रदेश र स्थानीय तहबीच प्रभावकारी समन्वय गर्दै प्रभावित नागरिकको उद्धार तथा राहतलाई तत्काल प्राथमिकतामा राख्नुपर्ने बताएका छन्। विपद् व्यवस्थापनका लागि सरकारले अघि बढाउने सबै प्रयासमा नेपाली कांग्रेसको पूर्ण साथ र सहयोग रहनेसमेत उनले जनाएका छन्।

बाढीका कारण भोटेकोशी तथा त्रिशूली नदीको बहाव बढ्न सक्ने भन्दै थापाले तल्लो तटीय क्षेत्र र आसपासका बस्तीमा उच्च सतर्कता अपनाउन सर्वसाधारणलाई आग्रह गरेका छन्।

उनले नेपाली कांग्रेसका सबै तहका समिति तथा कार्यकर्तालाई पनि विपद्को समयमा परिचालित हुन अपिल गरेका छन्। विशेषगरी रसुवा, नुवाकोट, धादिङ, गोरखा र चितवनलगायत जिल्लाका पार्टी नेतृत्व तथा सदस्यलाई नदी तटीय क्षेत्रमा बसोबास गर्ने परिवारलाई सुरक्षित स्थानमा सार्न तथा उद्धार र राहतमा तत्काल जुट्न उनले आग्रह गरेका हुन्।

रसुवाको भोटेकोशीमा आएको भीषण बाढीले टिमुरे तथा आसपासका क्षेत्रमा ठूलो क्षति पुर्‍याएको प्रारम्भिक विवरण आइरहेका बेला कांग्रेस सभापति थापाले विपद्को जोखिम तल्लो तटीय क्षेत्रमा समेत बढ्न सक्ने भन्दै सरकार र राजनीतिक दलका संयन्त्रलाई सक्रिय हुन आग्रह गरेका हुन्।