काठमाडौं। तिब्बततर्फबाट आएको भीषण बाढीले रसुवामा नेपाल प्रहरीका तीन वटा कार्यालयमा ठूलो क्षति पुर्‍याएको छ।

प्रहरी प्रधान कार्यालयका अनुसार इलाका प्रहरी कार्यालय टिमुरे, प्रहरी चौकी स्याफ्रुबेँसी र प्रहरी चौकी रसुवागढी बाढीबाट प्रभावित भएका हुन्।

भोटेकोशी नदीमा आएको बाढीले प्रहरी कार्यालयका भौतिक संरचनामा क्षति पुर्‍याएपछि त्यहाँ कार्यरत प्रहरी कर्मचारीको अवस्थाबारे थप विवरण संकलन भइरहेको प्रहरीले जनाएको छ।

बाढीले टिमुरे, स्याफ्रुबेँसी र रसुवागढी क्षेत्रमा व्यापक क्षति पुर्‍याएको छ।

प्रभावित क्षेत्रमा उद्धार तथा खोजी कार्य जारी रहेकाले प्रहरी कार्यालय र त्यहाँ कार्यरत सुरक्षाकर्मीको विस्तृत अवस्थासमेत क्रमशः खुल्ने प्रहरी प्रधान कार्यालयले जनाएको छ।