काठमाडौं । भोटेकोशी र त्रिशूली नदीमा आएको बाढीबाट जनधन तथा भौतिक संरचनामा भएको क्षतिप्रति जय नेपाल पार्टीले दुःख व्यक्त गरेको छ।

पार्टी केन्द्रीय कार्यालय चाबहिलबाट जारी प्रेस विज्ञप्तिमार्फत नदी तटीय क्षेत्र, आसपासका बस्ती तथा बजारमा बाढीको जोखिम बढिरहेको भन्दै स्थानीय बासिन्दालाई उच्च सावधानी र सतर्कता अपनाउन अपिल गरिएको हो।

जय नेपाल पार्टीले विपद्को यस आपत्कालीन अवस्थामा बाढी पूर्वानुमान शाखाको प्राविधिक सल्लाहलाई समेत ध्यानमा राख्दै उद्धार, राहत, विपद् व्यवस्थापन तथा क्षति न्यूनीकरणका कामलाई प्राथमिकतामा राख्न सरकारसँग आग्रह गरेको छ।

पार्टीले प्रभावित क्षेत्रमा तत्काल आवश्यक सम्पूर्ण सरकारी संयन्त्र परिचालन गर्न तथा जोखिममा रहेका नागरिकलाई सुरक्षित स्थानमा स्थानान्तरण गर्न सरकारको गम्भीर ध्यानाकर्षण गराएको छ।

बाढीका कारण नदी तटीय क्षेत्रमा थप जोखिम बढ्न सक्ने भएकाले सम्भावित क्षति न्यूनीकरणका लागि समयमै आवश्यक कदम चाल्नुपर्नेमा पार्टीले जोड दिएको छ।

जय नेपाल पार्टीका सचिवालय प्रमुख सगुन सुन्दर लावतीद्वारा जारी विज्ञप्तिमा प्रभावित नागरिकको जीवनरक्षा, उद्धार तथा राहतलाई तत्काल प्राथमिकतामा राख्न सरकारसँग माग गरिएको छ।