काठमाडौं । नेपाली कांग्रेसकी प्रमुख सचेतक वासना थापाले रसुवाबाट सुरु भएको विनाशकारी बाढी तथा पहिरोले देशभर शोकको अवस्था सिर्जना गरेको भन्दै विपद्को यो घडीमा राजनीतिभन्दा नागरिकको जीवनरक्षालाई प्राथमिकता दिन सरकारसँग आग्रह गरेकी छन्।

बुधबार बसेको प्रतिनिधिसभा बैठकमा बोल्दै थापाले विपद्मा परेका नागरिकले ‘राज्य हाम्रो साथमा छ, सरकार हाम्रो दुःखमा उभिएको छ’ भन्ने अनुभूति गर्न सक्ने गरी उद्धार, राहत र उपचारका संयन्त्र परिचालन गर्नुपर्ने बताइन्।

उनले बेपत्ता नागरिकको खोजी, घाइतेको तत्काल उपचार र विस्थापित परिवारको सुरक्षित व्यवस्थापनमा कुनै कसर बाँकी राख्न नहुनेमा जोड दिइन्।

सरकारले सञ्चालन गर्ने उद्धार तथा राहतका सबै काममा नेपाली कांग्रेसले पूर्ण सहयोग गर्ने प्रतिबद्धता जनाउँदै थापाले विपद्को समयमा सरकारलाई सहयोग गर्नु राजनीतिक जिम्मेवारीसँगै मानवीय दायित्वसमेत भएको बताइन्। कांग्रेसका कार्यकर्ता प्रभावित क्षेत्रमा पुगेर उद्धार तथा राहतमा जुटिसकेको उनले जानकारी दिइन्।

बाढीबाट भएको क्षतिको यथार्थ विवरण तत्काल संकलन गरी प्रभावित क्षेत्रमा आवश्यक राहत सामग्री पुर्‍याउन र पुनःस्थापना तथा पुनर्निर्माणका काम ढिलाइ नगरी अघि बढाउन पनि उनले सरकारको ध्यानाकर्षण गराइन्।

रसुवा, नुवाकोट, धादिङ, चितवन र गोरखासहित बाढी प्रभावित नागरिकको दुःखमा सिंगो नेपाल उभिएको बताउँदै थापाले विपद् व्यवस्थापनमा सबै पक्ष एकजुट भएर लाग्न अपिल गरिन्।