काठमाडौं। रसुवाको भोटेकोशीसहित विभिन्न क्षेत्रमा आएको विनाशकारी बाढीले देशलाई शोकमा डुबाएका बेला पूर्वप्रधानमन्त्री एवं नेकपाका संयोजक पुष्पकमल दाहाल ‘प्रचण्ड’ले राजनीति थाती राखेर राष्ट्रिय एकताका साथ विपद्को सामना गर्नुपर्ने बताएका छन्।

राष्ट्रिय स्वतन्त्र पार्टी (रास्वपा)का सभापति रवि लामिछानेको आह्वानमा सिंहदरबारमा बसेको सर्वदलीय बैठकमा प्रचण्डले अहिले दलबीचको मतभेद खोज्ने समय नभएको बताए। विपत्तिमा परेका नागरिकको ज्यान जोगाउने, बेपत्ताको खोजी गर्ने र पीडितलाई राहत पुर्‍याउने काममा सबै राजनीतिक शक्ति एक ठाउँमा उभिनुपर्ने उनको भनाइ थियो।

‘अहिले देश गम्भीर प्राकृतिक विपत्तिसँग जुधिरहेको छ। यस्तो अवस्थामा लामो राजनीतिक बहस र पूर्वाग्रहमा अल्झिने समय होइन। सबै राजनीतिक शक्ति एकै ठाउँमा उभिएर जनताको जीवन रक्षामा लाग्नुपर्छ,’ प्रचण्डले भने।

उनले विपत्तिमा परेका नागरिकले राज्य आफूहरूसँगै रहेको अनुभूति गर्न सक्ने गरी उद्धार र राहतको काम अघि बढाउनुपर्ने बताए। कुनै पनि नागरिकले संकटका बेला आफू एक्लिएको महसुस गर्न नहुने उनको भनाइ थियो।

प्रचण्डले तत्काल उद्धारमा जोड दिँदै अबका दिनमा विपद् सामना गर्ने राज्यको तयारीसमेत पुनर्विचार गर्नुपर्ने बताए। हिमाली क्षेत्रमा देखिएका पछिल्ला प्राकृतिक विपत्ति सामान्य मौसमी घटनामा मात्र सीमित नरहेको भन्दै उनले जलवायु परिवर्तन र वातावरणीय जोखिमलाई समेत गम्भीर रूपमा लिनुपर्ने बताए।

भोटेकोशीमा आएको बाढीको प्रसङ्ग जोड्दै प्रचण्डले छिमेकी मुलुकसँग विपद्सम्बन्धी सूचना आदान–प्रदानको संयन्त्र प्रभावकारी बनाउनुपर्ने बताए।

हिमताल विस्फोट, बाढी र पहिरोजस्ता घटनाबारे सम्भावित जोखिमको सूचना समयमै प्राप्त भए तल्लो तटीय क्षेत्रमा रहेका नागरिकलाई सुरक्षित स्थानमा सार्न सकिने उनको भनाइ थियो। त्यसका लागि छिमेकी देशहरूसँगको समन्वयलाई संस्थागत बनाउनुपर्ने उनले बताए।

जलवायु परिवर्तनको असर नेपालजस्ता हिमाली मुलुकमा बढ्दै गएको उल्लेख गर्दै प्रचण्डले अन्तर्राष्ट्रिय मञ्चमा जलवायु न्याय र क्षतिपूर्तिको मुद्दा बलियो रूपमा उठाउनुपर्ने धारणा राखे।

उनले विगतका ठूला विपत्तिमा राजनीतिक दलहरूले देखाएको एकताको स्मरणसमेत गरे। कोशी बाढी, जुरे पहिरो, २०७२ सालको भूकम्प र जाजरकोट भूकम्पका बेला दलहरू एक ठाउँमा उभिएर राहत तथा उद्धारमा खटिएको भन्दै अहिले पनि त्यही राजनीतिक संस्कार आवश्यक रहेको बताए।

प्रचण्डले भोटेकोशी बाढीबाट प्रभावित नागरिकको उद्धार र राहतमा आफ्नो पार्टी सरकारसँग सहकार्य गर्न तयार रहेको बताए। उनले पार्टीका नेता तथा कार्यकर्तालाई सरकारी निकायसँग समन्वय गरेर प्रभावित क्षेत्रमा परिचालन हुन निर्देशन दिइसकेको जानकारी दिए।

सरकारका संयन्त्रसँगै राजनीतिक दल, नागरिक समाज र अन्य सामाजिक संस्थाको सामूहिक प्रयासबाट मात्रै ठूलो विपत्तिको सामना गर्न सकिने उनको भनाइ थियो।

‘विपत्तिमा कोही नागरिक एक्लो नहोस्, उद्धार र राहतमा कुनै ढिलाइ नहोस् र राज्यको पहुँचबाट कोही बाहिर नपरोस् भन्ने साझा सङ्कल्पका साथ हामी अघि बढ्नुपर्छ,’ प्रचण्डले भने।