काठमाडौं। भोटेकोशी बाढीले विद्युत् संरचनामा ठूलो क्षति पुर्‍याएपछि रसुवासहितका प्रभावित क्षेत्रमा तत्कालका लागि वैकल्पिक ऊर्जाको व्यवस्था गर्न थालिएको छ।

बाढीका कारण १२ वटा जलविद्युत् आयोजनामा क्षति पुगेपछि ४३१.१ मेगावाट विद्युत् उत्पादन बन्द भएको ऊर्जा, जलस्रोत तथा सिँचाइ मन्त्रालयले जनाएको छ। विद्युत् पूर्वाधारमा भएको क्षतिका कारण रसुवा, नुवाकोट र धादिङका विभिन्न क्षेत्रमा नियमित विद्युत् आपूर्ति प्रभावित भएको हो।

तत्कालै विद्युत् लाइन जोड्न कठिन भएपछि ऊर्जा मन्त्रालयले वैकल्पिक रूपमा ५०० वटा सोलार पावर बैंक प्रभावित क्षेत्रमा पठाउने तयारी गरेको छ। ऊर्जा मन्त्रालयले वैकल्पिक ऊर्जा प्रवर्द्धन केन्द्रसँगको सहकार्यमा ती पावर बैंक विपद् जोखिम न्यूनीकरण तथा व्यवस्थापन राष्ट्रिय परिषद्लाई हस्तान्तरण गर्न लागेको हो।

ऊर्जामन्त्री विराज भक्त श्रेष्ठका प्रमुख स्वकीय सचिव सन्जिव महर्जनका अनुसार रसुवाको सबस्टेसनमा ठूलो क्षति पुगेकाले तत्काल विद्युत् आपूर्ति नियमित गर्न सम्भव छैन। त्यसैले बत्ती बाल्न र मोबाइल चार्ज गर्न सकिने सोलार पावर बैंक प्रभावित नागरिकसम्म पुर्‍याउन लागिएको हो।

बाढीका कारण त्रिशूलीस्थित २२० केभीको ३बी हब सबस्टेसनमा पूर्ण क्षति पुगेको छ। त्यस्तै, ६ वटा प्रसारण लाइनसमेत अवरुद्ध छन्। जलविद्युत् आयोजना र प्रसारण संरचनामा भएको क्षतिले मुलुकको कुल विद्युत् उत्पादन क्षमताको करिब १० प्रतिशत बराबर उत्पादन प्रभावित भएको मन्त्रालयले जनाएको छ।

विद्युत् आपूर्ति व्यवस्थापनबारे जानकारी लिन ऊर्जामन्त्री श्रेष्ठले स्युचाटारस्थित राष्ट्रिय विद्युत् प्रेषण केन्द्र (लोड डिस्प्याच सेन्टर) को निरीक्षण गर्ने भएका छन्। बाढीले देशको विद्युत् प्रणालीमा पारेको असर र आपूर्ति पुनःस्थापनाको अवस्थाबारे उनले जानकारी लिनेछन्।

यता, प्रभावित क्षेत्रमा विद्युत् सेवा फर्काउन वैकल्पिक प्रसारण संरचना सञ्चालनको काम पनि अघि बढाइएको छ। सिन्धुपाल्चोकको समुद्रटारस्थित चौघोडा सबस्टेसन सञ्चालनमा ल्याउने प्रयास भइरहेको छ भने गुजुरीदेखि गल्छीसम्म धादिङबेँसी सबस्टेसनमार्फत विद्युत् आपूर्ति गर्ने तयारी गरिएको छ।

सम्भव भएका अन्य क्षेत्रमा प्राविधिक टोली परिचालन गरी क्षतिग्रस्त संरचनाको निरीक्षण, मर्मत र लाइन पुनःसञ्चालनको काम भइरहेको मन्त्रालयले जनाएको छ। विद्युत् प्रणालीलाई सुरक्षित र निरन्तर सञ्चालनमा राख्न सम्बन्धित निकायलाई आवश्यक निर्देशन दिइएको छ।

आवश्यकता परे तत्काल प्रयोग गर्न भीमफेदीमा रहेको जेनेरेटरसमेत प्रभावित क्षेत्रमा पठाउन तयारी अवस्थामा राखिएको मन्त्रालयले जनाएको छ।