रसुवा । रसुवामा आएको विनाशकारी बाढीले मैलुङखोला क्षेत्रमा ठूलो क्षति पुर्‍याएको भन्दै त्यहाँ तत्काल उद्धार टोली पठाउन माग गरिएको छ। ५ मेगावाट क्षमताको तल्लो मैलुङखोला जलविद्युत् गृहमा कार्यरत ७ जना कर्मचारी अझै सम्पर्कविहीन रहेको बताइएको छ।

सम्पर्कविहीन हुनेमध्ये रबिन तामाङसमेत रहेको बताइएको छ। बाढीले जलविद्युत् गृहसँगै मैलुङखोला गाउँ नै बगाएको र ठूलो संख्यामा स्थानीयवासीसमेत बेपत्ता भएको दाबी गरिएको छ।

तर, बाढी प्रभावित क्षेत्रमा अहिलेसम्म राज्यका उद्धार संयन्त्र पुग्न नसकेको भन्दै गुनासो गरिएको छ। प्रभावित क्षेत्रमा कति धनजनको क्षति भयो भन्ने प्रारम्भिक विवरणसमेत राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग नरहेको बताइएको छ।

उद्धारका लागि पहल गर्न भन्दै प्रभावितका आफन्त तथा स्थानीय प्रतिनिधिहरूले बिहीबार दिनभर सिंहदरबारस्थित राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यालयमा पुगेर आग्रह गरेका थिए। उनीहरूले कम्तीमा हेलिकप्टर पठाएर ज्यान बचाउन सकिने अवस्थाका व्यक्तिहरूको उद्धार गर्न आग्रह गरे पनि हालसम्म त्यहाँ हेलिकप्टर वा सुरक्षाकर्मीको उद्धार टोली नपुगेको गुनासो गरेका छन्।

‘कम्तीमा हेलिकप्टर पठाएर हेर्नुस्, बाँच्ने सम्भावना भएकाहरूलाई उद्धार गरिदिनुस् भनेर आग्रह गर्‍यौँ। तर अहिलेसम्म न हेलिकप्टर गएको छ, न उद्धारका लागि सुरक्षाकर्मी पुगेका छन्,’ प्रभावितका आफन्तहरूले बताएका छन्।

मैलुङखोला जलविद्युत् आयोजनाको प्रभावित क्षेत्र रसुवाको मैलुङ दोभान क्षेत्रमा पर्छ। बाढीका कारण सो क्षेत्रको जलविद्युत् गृह तथा आसपासका बस्तीमा ठूलो क्षति पुगेको बताइएको छ।

उद्धार तथा राहतमा ढिलाइ भएको भन्दै प्रभावितका आफन्तहरूले राज्यका निकायको ध्यानाकर्षण गराएका छन्। उनीहरूले विपद्को समयमा पहुँचका आधारमा उद्धार हुने अवस्था अन्त्य गर्दै जोखिममा रहेका सबै नागरिकको तत्काल उद्धार गर्न माग गरेका छन्।