काठमाडौं – नेकपा एमालेका नेता विष्णु रिमालले प्राकृतिक विपत्तिका बेला राजनीति नगर्न र जनताको भावनामा खेलबाड नगर्न आग्रह गरेका छन्।

सामाजिक सञ्जालमार्फत धारणा सार्वजनिक गर्दै रिमालले विपत्तिको समयमा उद्धार, राहत तथा पुनर्स्थापना र पुनर्निर्माणका काम एकसाथ अघि बढाउनुपर्ने बताएका छन्। उनले केन्द्रदेखि स्थानीय तहसम्मका सरकार तथा सरकारी निकायलाई समन्वयात्मक रूपमा परिचालन गर्नुपर्नेमा जोड दिएका छन्।

रिमालले विपत्तिमा सरकारी संयन्त्रसँगै जनताका संगठनलाई समेत सहयोगमा परिचालन गर्नुपर्ने बताएका छन्। तर, आफूले फिल्डमा हेर्दा केन्द्र सरकार एक्लै अघि बढ्न खोजेको जस्तो देखिएको उनको टिप्पणी छ।

राज्यको सामर्थ्य परिचालन गर्ने जनादेश पाएकाहरूले त्यसलाई नियन्त्रण गरेर जनतालाई ‘प्रचारका खुराक’ मात्र पस्किए अन्याय हुने उनले बताएका छन्।

उनले सामाजिक सञ्जालमा लेखेका छन् –

प्लीज जनताको भावनामा खेलबाड नगर!
यस्ता विपत्तिमा उद्धार (रेस्क्यु), राहत (रिलिफ) र पुनर्स्थापना/पुनर्निर्माण (रिहाबिलिटेशन) सँगसँगै सञ्चालन गरिन्छ। केन्द्रदेखि स्थानीयसम्म सरकार र सरकारी निकायलाई समन्वयात्मक ढंगले परिचालन गरिन्छ।जनताका संगठनहरूलाई साथसाथै सहयोगमा मोबिलाइज गरिन्छ।
तर फिल्डमा हेर्दा यस्तो देखिन्छ– केन्द्रको सरकार एक्लै चल्न खोजिरहेको छ। राज्यको सामर्थ्य परिचालनको जनादेश पाएकाहरूले त्यही सामर्थ्यलाई नियन्त्रण गरी जनतालाई ‘प्रचारका खुराक’ मात्र पस्कँदा अनर्थ मात्र हुँदैन, अन्याय हुन्छ। कसैले भनेको सुनेको थिएँ– धेरैको विपत्ति केहीका लागि व्यापारको अवसर बन्छ। सुनिँदै छ, केन्द्रका केही मन्त्री विगतमा संलग्न रहेको वा हाल उनीहरूद्वारा प्रवर्द्धित एनजिओहरूले राहतको नाममा “फिल्ड-कब्जा”को धन्दा सुरु गरेका छन्।
विपत्तिमा राजनीति बन्द गर।
सहयोग गर्न चाहनेलाई सहजीकरण गर।
सके दुःखमा मल्हम लगाऊ–
नसके जनताको भावनामा प्लीज खेलबाड नगर।