काठमाडौं । भोटेकोशी र त्रिशूली नदी तटीय क्षेत्रमा आएको भीषण बाढीबाट उत्पन्न विषम परिस्थितिलाई मध्यनजर गर्दै जय नेपाल पार्टी (प्रस्तावित) ले बाढीपीडित सहयोग समिति गठन गरेको छ।

पार्टीले जारी गरेको प्रेस विज्ञप्तिअनुसार सभापति डा. धवलशम्सेर राणाको संयोजकत्वमा सम्पूर्ण केन्द्रीय सदस्यहरू सदस्य रहने गरी बाढीपीडित सहयोग समिति गठन गरिएको हो। समितिले बाढी प्रभावित क्षेत्रमा राहत, सहयोग तथा आवश्यक समन्वयका लागि काम गर्ने पार्टीले जनाएको छ।

यसैबीच, पार्टीले आफ्नो विधानबमोजिम विभिन्न विभाग, समिति तथा जनवर्गीय संगठनको जिम्मेवारीसमेत तोकेको छ।

जसअनुसार अन्तर्राष्ट्रिय सम्बन्ध विभागको संयोजकमा डा. धवलशम्सेर राणा र सुपरिवेक्षण समिति तथा जनवर्गीय संगठन संयोजन विभागको संयोजकमा मुकुन्दश्याम गिरीलाई जिम्मेवारी दिइएको छ। पार्टीको सचिवालय प्रमुखमा सगुन सुन्दर लावती रहेका छन्।

त्यस्तै, संगठन विभागको संयोजकमा प्रज्जवल बोहरा, प्रशिक्षण विभागमा संगीता सिलवाल, आर्थिक स्रोत व्यवस्थापन विभागमा होमनाथ गौतम, अनुसन्धान तथा योजना विभागमा इश्वरी भट्टराई र सूचना तथा प्रविधि विभागमा प्रभात योगीलाई जिम्मेवारी दिइएको छ।

शिक्षा विभागको संयोजकमा कर्णबहादुर शाही, खेलकुद विभागमा दमन बस्नेत, प्रवास विभागमा शशी सिलवाल, सुशासन तथा भ्रष्टाचार न्यूनीकरण विभागमा प्रकाश जंग कार्की, वातावरण विभागमा पवित्रा सुब्बा श्रेष्ठ तथा सम्पर्क समाज विभागमा फणीराज लोहनीलाई संयोजक तोकिएको छ।

यसैगरी, मूल्याङ्कन तथा अभिलेख विभागको संयोजकमा विकास श्रेष्ठ, अर्थनीति अनुसन्धान विभागमा श्यामल कृष्ण श्रेष्ठ तथा सूचना सञ्चार समितिको संयोजकमा सुरेश आचार्यलाई जिम्मेवारी दिइएको छ।

पार्टीले प्रचारप्रसार तथा सामाजिक सञ्जालसम्बन्धी जिम्मेवारी पनि छुट्टाछुट्टै तोकेको छ। प्रचारप्रसार तथा सामाजिक सञ्जाल विभागको संयोजकमा शशांक शम्सेर थापा, सामाजिक सञ्जालतर्फ रञ्जन कार्की र मिडियातर्फ राधिका जोशीलाई जिम्मेवारी दिइएको छ। त्यस्तै, तराई–मधेस विभागको संयोजकमा राम नेरश यादवलाई तोकिएको छ।

जनवर्गीय संगठनमा पनि जिम्मेवारी

जय नेपाल पार्टीले विभिन्न जनवर्गीय संगठनको नेतृत्वसमेत तोकेको छ। जसअनुसार नेपाल युवा संगठनको सभापतिमा निराजन बम र नेपाल महिला संगठनको सभापतिमा अन्जना शाह रावललाई जिम्मेवारी दिइएको छ।

त्यस्तै, नेपाल भूतपूर्व सैनिक संगठनको सभापतिमा मनोज कुमार सिलवाल, राष्ट्रिय प्रजातान्त्रिक ट्रेड युनियन महासंघ नेपालको सभापतिमा चिराग मान सिंह कुँवर, नेपाल किसान संगठनको सभापतिमा अमृत परियार तथा नेपाल नागरिक मोर्चाको सभापतिमा पशुपति कठायतलाई जिम्मेवारी दिइएको छ।

पार्टीका सचिवालय प्रमुख सगुन सुन्दर लावतीले जारी गरेको विज्ञप्तिमा बाढीबाट प्रभावित नागरिकको उद्धार, राहत तथा सहयोगलाई प्राथमिकतामा राख्दै पार्टीका सबै तहका नेता तथा कार्यकर्तालाई सक्रिय हुन आह्वान गरिएको छ।