काठमाडौं। पूर्वमन्त्री तथा नेपाली कांग्रेसका सांसद टेकबहादुर गुरुङले भोटेकोशी–त्रिशूली बाढीपीडितका लागि प्रधानमन्त्री राहत उद्धार कोषमा एक लाख ११ हजार १११ रुपैयाँ सहयोग गरेका छन् ।

गुरुङले मंगलबार प्रधानमन्त्री राहत उद्धार कोषमा उक्त रकम पठाएका हुन् । हालै नुवाकोटको त्रिशूली नदीको बाढीबाट प्रभावित ढुंगेबजार र देवीघाट क्षेत्रको स्थलगत अनुगमन गरी फर्किएलगत्तै उनले राहतस्वरूप नगद सहयोग गरेका हुन् ।

स्थलगत अनुगमनका क्रममा बाढीले त्रिशूली तथा आसपासका क्षेत्रमा ठूलो क्षति पुर्‍याएको देखिएको गुरुङले बताएका छन् । उनले भोटेकोशी र त्रिशूली नदीले पुल बगाउँदा तथा सडक पूर्ण रूपमा क्षतिग्रस्त हुँदा स्थानीयको आवतजावतमा गम्भीर समस्या परेको उल्लेख गरे ।

तत्कालका लागि नदी वारिपारि गर्न तुइनको व्यवस्था गर्नुपर्नेमा उनले जोड दिएका छन् । पुल र सडक पुनर्निर्माणमा समय लाग्ने भएकाले प्रभावित नागरिकको आवागमन सहज बनाउन अस्थायी रूपमा तुइन सञ्चालन गर्नुपर्ने उनको भनाइ छ ।

बाढी प्रभावित क्षेत्रमा राहत, उद्धार र पुनःस्थापनाको कामलाई सरकारले थप प्रभावकारी बनाउनुपर्ने गुरुङले बताएका छन्।