काठमाडौं । मरिचमान श्रेष्ठ ‘बल्छी धुर्बे’सहित टेलिभिजन श्रृंखला ‘जुठे’ र ‘हल्का रमाइलो’का कलाकार बाढी प्रभावित क्षेत्रमा राहत वितरणमा जुटेका छन्।

टोलीले सोमबार नुवाकोटको त्रिशूली–११ गेर्खु र विदुर–२ का ३० भन्दा बढी परिवारलाई लत्ताकपडा, खाद्यान्न र शैक्षिक सामग्री वितरण गरेको छ। करिब १ लाख रुपैयाँ बराबरको राहत सामग्री वितरण गरिएको बल्छी धुर्बेले बताए।

टोली दोस्रो चरणको राहत वितरणका लागि रसुवाको उत्तरगया गाउँपालिकातर्फ गएको छ। बल्छी धुर्बेसहित बान्द्रे, पुकु र साहुनी पात्रका कलाकार राहत वितरणमा सहभागी छन्। स्थानीय खगेन्द्र पोखरेलले समन्वय गरिरहेका छन्।

बल्छी धुर्बेका अनुसार प्रभावितहरूले सरकारी राहत समयमै नपाएको गुनासो गरेका छन्। उनले राहत सामग्री होल्डिङ सेन्टरमा थन्क्याएर राख्नुभन्दा तत्काल प्रभावित परिवारसम्म पुर्‍याउन सरकारसँग आग्रह गरे।

उनले राहत वितरणमा एकद्वार प्रणालीभन्दा बहुद्वार नीति अपनाउनसमेत सरकारलाई सुझाव दिएका छन्।