काठमाडौं। प्रमुख प्रतिपक्षी नेपाली कांग्रेसका नेता भीष्मराज आङ्देम्बेले भोटेकोशी बाढीपछि सुरुङभित्र फसेका नागरिकको खोज तथा उद्धारमा भएको ढिलाइ भएको बताएका छन्।

बुधबार प्रतिनिधिसभा बैठकलाई सम्बोधन गर्दै आङ्देम्बेले सुरुङभित्र फसेकाहरूको उद्धारमा भइरहेको ढिलाइलाई अमानवीय र गम्भीर विषय भएको जिकिर गरेका हुन्।

उनले अझै ६२ जिल्लाका ३ हजार ९१६ जना सम्पर्कविहीन रहेको विवरण आएको भन्दै खोज तथा उद्धारलाई तत्काल प्रभावकारी बनाउन प्रति सरकारको गम्भीर ध्यानाकर्षण गराए।

‘खोज तथा उद्धार अहिले सबैभन्दा बढी खड्किएको विषय हो। अझै पनि ६२ जिल्लाका ३ हजार ९१६ नागरिक सम्पर्कविहीन छन्। समयक्रममा यो संख्या अझै बढ्न सक्छ,’ उनले भने।

आङ्देम्बेले सुरुङभित्र फसेका नागरिकको अवस्था थप जोखिमपूर्ण बन्दै गएको भन्दै उद्धारमा ढिलाइ गर्नु गम्भीर गल्ती हुने बताए।

उनका अनुसार सुरुदेखि नै सरकारी संयन्त्रसँगै निजी क्षेत्रका स्रोतसाधन प्रयोग गरी आवश्यक परे अन्तर्राष्ट्रिय प्रविधि र दक्ष उद्धार टोलीसमेत परिचालन गर्नुपर्ने थियो।

उनले खोज तथा उद्धारलाई तत्काल सरकारको पहिलो प्राथमिकता बनाएर उपलब्ध सबै स्रोत र प्रविधि परिचालन गर्न आग्रह गरे।