काठमाडौं । नेपालमा पहिलोपटक आयोजना हुन लागेको पुरुष भलिबलको फ्रेन्चाइज प्रतियोगिता नेपाल भलिबल लिग (एनभीएल) सुरु हुन अब दुई दिन मात्रै बाँकी छ। केडिया ग्रुपको आयोजनामा हुने प्रतियोगिता भदौ १९ देखि २७ गतेसम्म काठमाडौंको त्रिपुरेश्वरस्थित दशरथ रंगशालाको कभर्डहलमा सञ्चालन हुनेछ।

प्रतियोगितामा ६ फ्रेन्चाइज टोलीले उपाधिका लागि प्रतिस्पर्धा गर्नेछन्। महिला भलिबलको फ्रेन्चाइज लिग यसअघि नै आयोजना भइसके पनि पुरुषतर्फ भने पहिलोपटक फ्रेन्चाइज अवधारणामा प्रतियोगिता हुन लागेको हो। त्यसैले प्रतियोगितालाई लिएर आयोजक, खेलाडी तथा भलिबलप्रेमीमा उत्साह देखिएको छ।

एनभीएलको अर्को आकर्षण भनेको विदेशी खेलाडीको सहभागिता हो। प्रतियोगिताको नियमअनुसार प्रत्येक टोलीले तीन जना विदेशी खेलाडीलाई आफ्नो टोलीमा समावेश गर्न पाउनेछन्। सोहीअनुसार विभिन्न देशका खेलाडीहरू नेपाल आउने क्रम जारी छ।

यसअघि नेपाल भलिबल संघले आयोजना गर्ने अधिकांश प्रतियोगितामा भारत र पाकिस्तानका खेलाडीको सहभागिता बढी हुने गरेको थियो। तर एनभीएलमा भने एसियाली मुलुकसँगै युरोप, अफ्रिका र ल्याटिन अमेरिकी क्षेत्रका खेलाडीसमेत सहभागी हुँदैछन्।

हालसम्म ९ देशका विदेशी खेलाडी नेपाल आइसकेका छन्। पाकिस्तानबाट सबैभन्दा बढी पाँच खेलाडी सहभागी हुने निश्चित भएको छ। यस्तै, भारत र मंगोलियाबाट तीन–तीन खेलाडी नेपाल आइसकेका छन्।

त्यसैगरी पोल्यान्ड, बेलारुस, इरान, रुस र बेनिनबाट एक-एक खेलाडी नेपाल आएका छन्। यसले एनभीएललाई नेपाली घरेलु प्रतियोगितामात्र नभई अन्तर्राष्ट्रिय खेलाडीको समेत जमघट हुने प्रतियोगिताका रूपमा अघि बढाएको छ।

विदेशी खेलाडीको सहभागिताले नेपाली भलिबलको अन्तर्राष्ट्रिय प्रचारमा समेत योगदान पुग्ने आयोजकको अपेक्षा छ। साथै, नेपाली खेलाडीले विभिन्न देशका अनुभवी खेलाडीहरूसँग एउटै कोर्टमा खेल्दै आफ्नो क्षमता र खेल कौशल विकास गर्ने अवसर पाउनेछन्।

एनभीएलमा सहभागी हुने १८ विदेशी खेलाडीमध्ये अब एक जना खेलाडी मात्र नेपाल आउन बाँकी रहेको छ। प्रतियोगिता नजिकिँदै जाँदा सबै टोली अन्तिम तयारीमा जुटेका छन्।