काठमाडौं । नेपाली कांग्रेसकी सांसद सिता थपलिया ‘उर्मिला’ले विपद्का बेला नागरिकको जीवन रक्षा राज्यको पहिलो जिम्मेवारी भए पनि सरकार त्यसमा चुकेको टिप्पणी गरेकी छन्।

बिहीबार प्रतिनिधिसभा बैठकमा बोल्दै उनले राष्ट्रिय शोकको अवस्थामा सरकारलाई उद्धार तथा राहत अभियानमा आफ्नो पार्टीको पूर्ण साथ रहने बताइन्। तर, बाढीपछि प्रभावित क्षेत्रमा उद्धारमा भएको ढिलाइप्रति भने उनले सरकारको कडा आलोचना गरिन्।

बाढी आएको नौ दिन बितिसक्दा पनि त्रिशूली–३ ए र त्रिशूली–३ बी जलविद्युत् आयोजनाका सयौँ कामदार सुरुङभित्र फसेको जानकारी हुँदाहुँदै प्रभावकारी उद्धार हुन नसक्नु गम्भीर विषय भएको उनको भनाइ थियो।

उनले उद्धारको जिम्मेवारी ढिलो गरी आयोजनामाथि पन्छाइएको भन्दै राज्य संयन्त्रको क्षमतामाथि प्रश्न उठाइन्। नागरिकको जीवन रक्षामा कुनै बहानामा ढिलाइ गर्न नहुने भन्दै उनले अहिले आम नागरिकले राज्यको उपस्थिति नै कमजोर महसुस गरिरहेको बताइन्।

आफ्नो गृहजिल्ला धादिङको अवस्थाबारे जानकारी दिँदै सांसद थपलियाले बाढी र पहिरोका कारण १४४ जना अझै बेपत्ता रहेको र हालसम्म १० जनाको मात्र शव पहिचान भएको बताइन्।

विपद्मा आफन्त, साथीभाइ तथा गाउँले गुमाउँदाको पीडा शब्दमा व्यक्त गर्न कठिन रहेको उनले बताइन्। उनका अनुसार धादिङमा करिब ५०० परिवार विस्थापित भएका छन् भने ६ वटा पक्की र १३ वटा झोलुङ्गे पुलमा क्षति पुगेको छ।

नदी कटानबाट हजारौँ रोपनी खेतीयोग्य जमिन प्रभावित भएको तथा विद्यालय, होटल, रिसोर्टलगायत भौतिक संरचनामा समेत ठूलो क्षति पुगेको उनले सदनलाई जानकारी गराइन्।

गजुरी र गल्छी क्षेत्रमा क्षति अझ बढी रहेको भन्दै उनले स्थानीय जनप्रतिनिधि निरन्तर उद्धार र राहतमा खटिरहेको बताइन्। राहत वितरणमा संलग्न वडा अध्यक्ष तथा अन्य जनप्रतिनिधिमाथि तथ्यहीन आरोप लगाएर विपद्मा परेका नागरिकको पीडा थप नबढाउन पनि उनले आग्रह गरिन्।

पृथ्वी राजमार्गको कृष्णभीर क्षेत्रमा त्रिशूली नदीले सडकतर्फ कटान गरेपछि पाँच दिनदेखि यातायात प्रभावित हुँदा धादिङमा औषधि, खाद्यान्न र इन्धनको आपूर्तिमा समस्या बढेको उनले बताइन्।

त्रिशूलीमाथिको फुर्के खोलाको पक्की पुल बाढीले बगाएपछि सदरमुकाम र राजधानीसँगको सडक सम्पर्कसमेत प्रभावित भएको भन्दै उनले तत्काल बेलिब्रिज निर्माण गरेर आवागमन सहज बनाउन सरकारसँग माग गरिन्।

राहत र पुनःस्थापनालाई प्रभावकारी बनाउन संघीय सरकारले स्पष्ट प्याकेज तथा मापदण्ड तयार गर्ने, प्रदेश सरकारले समन्वय गर्ने र स्थानीय तहले त्यसको कार्यान्वयन गर्ने गरी तीनै तहबीच जिम्मेवारी स्पष्ट गर्नुपर्ने उनको सुझाव थियो।

उद्धार तथा राहतमा खटिएका सुरक्षाकर्मीप्रति सम्मान व्यक्त गर्दै सांसद थपलियाले बाढी तथा पहिरोमा ज्यान गुमाएकाप्रति श्रद्धाञ्जली र घाइतेको शीघ्र स्वास्थ्यलाभको कामना गरिन्।