काठमाडौं । राष्ट्रिय स्वतन्त्र पार्टीका सांसद बुद्धिप्रसाद पन्तले भोटेकोशी र त्रिशूली नदीमा आएको बाढीपछि सम्पर्कविहीन भएका पर्साका नागरिकको खोजी तथा उद्धार तत्काल तीव्र पार्न सरकारसँग माग गरेका छन्।

बिहीबार प्रतिनिधिसभा बैठकमा बोल्दै उनले बेपत्ता आफन्तको अवस्थाबारे जानकारी पर्खिरहेका परिवारको पीडा झन् बढ्दै गएको बताए।

उपलब्ध स्रोतसाधन र जनशक्तिबाट सरकारले गरिरहेको प्रयास सकारात्मक भए पनि अब खोजी तथा उद्धारलाई उच्च प्राथमिकताका साथ युद्धस्तरमा अघि बढाउनुपर्ने उनको भनाइ थियो।

पन्तले त्रिशूली–३ ‘ए’ जलविद्युत् आयोजनामा कार्यरत इन्जिनियर दिलीप यादव, घट्टेखोला क्षेत्रबाट सम्पर्कविहीन सुनिलमान डङ्गोलसहित पर्साका विभिन्न स्थानका बेपत्ता नागरिकको विवरणसमेत सदनमा प्रस्तुत गरे।

उनका अनुसार अचुतम श्रेष्ठ, कमरुल होद्दा अन्सारी, समिम आलम, नवीनकुमार सिंह, नगनारायण पटेल, अजयकुमार यादव, सन्जय तामाङ, रमन श्रुप, अजिर अन्सारी, सहाबुद्दिन मन्सुरी, सर्फराज मिया, कविता हल्दिया, विकासकुमार वर्णवाल र अरवाज हवारी पनि सम्पर्कविहीनको सूचीमा छन्।

सांसद पन्तले स्वदेशी स्रोत, साधन र दक्ष जनशक्तिले मात्रै उद्धार सम्भव नभए मित्रराष्ट्र तथा अन्तर्राष्ट्रिय निकायसँग आवश्यक सहयोग लिएर भए पनि अभियानलाई गति दिन आग्रह गरे।

बेपत्ताका आफन्तहरू लामो समयदेखि आफ्ना प्रियजनको अवस्थाबारे पर्खाइमा रहेकाले सरकार अब ढिलो गर्ने अवस्थामा नरहेको उनले बताए। प्रभावकारी परिणाम देखिने गरी राज्यका सबै संयन्त्र परिचालन गर्नुपर्ने उनको जोड थियो।

जनताको भरोसा कायम राख्न भाषणभन्दा उद्धार अभियानको परिणाम महत्वपूर्ण हुने भन्दै पन्तले सरकारलाई उपलब्ध सम्पूर्ण शक्ति खोजी तथा उद्धारमा केन्द्रित गर्न पुनः आग्रह गरे।