काठमाडौं। बाढी प्रभावित क्षेत्रमा नेपाली सेनाको जस्तै पोसाक लगाएर पुगेको भनिएको ‘ग्रीन आर्मी’को विषय प्रतिनिधिसभामा प्रवेश गरेको छ।

राष्ट्रिय स्वतन्त्र पार्टी (रास्वपा) का सांसद हरिमोहन भण्डारीले उक्त समूहको पहिचान र गतिविधिबारे तत्काल छानबिन गर्न सरकारसँग माग गरेका छन्।

बिहीबार प्रतिनिधिसभाको बैठकमा बोल्दै उनले भने, ‘यो हरियो सेना भनेको के हो ? यसका बारेमा अविलम्ब छानबिन गर्न जरुरी देखेको छु।’

पछिल्लो समय सामाजिक सञ्जालमा नेपाली सेनाको जस्तै पोसाक लगाएका व्यक्तिहरू बाढी प्रभावित क्षेत्रमा उद्धार तथा राहतमा खटिएको दृश्य सार्वजनिक भएपछि उक्त समूहबारे विभिन्न प्रश्न उठिरहेका छन्।

सांसद भण्डारीले विपद्का बेला उद्धार र राहतका नाममा परिचालित हुने समूहको पहिचान स्पष्ट हुनुपर्ने बताए।

साथै उनले बाढीमा आफन्त गुमाएका तथा प्रभावित परिवारको व्यवस्थापनमा पनि सरकारको विशेष ध्यान जानुपर्ने माग गरे।

उनले विपद्पछि प्रभावित नागरिकलाई तत्काल राहतसँगै सुरक्षित आवास, आवश्यक सामग्री र पारिवारिक पुनःस्थापनाको व्यवस्था गर्न सरकारको ध्यानाकर्षण गराए।