काठमाडौं । नेकपा (एमाले)की सांसद एशोदा बरालले विपद्का बेला सरकारको उद्धार तथा राहत व्यवस्थापन सुस्त भएको भन्दै असन्तुष्टि जनाएकी छन्।

उनले राहत वितरणमा लागू गरिएको ‘एकद्वार प्रणाली’ले समेत प्रभावित नागरिकलाई समयमै सहयोग पुग्न नसकेको बताइन्।

बिहीबार प्रतिनिधिसभा बैठकमा बोल्दै बरालले विपद्को अवस्थामा नागरिकको जीवन जोगाउनु सरकारको पहिलो प्राथमिकता हुनुपर्ने बताइन्। जलविद्युत् आयोजनाका सुरुङमा फसेका मानिसहरू अझै जीवित हुन सक्ने सम्भावना रहेकाले उद्धारमा कुनै ढिलाइ गर्न नहुने उनको भनाइ थियो।

बरालले सुरुङभित्र मानिस बस्न मिल्ने संरचना रहेको आफूलाई जानकारी प्राप्त भएको दाबी गरिन्। उनका अनुसार केही व्यक्तिले सुरुङभित्र दुई तले भवनजस्तो संरचना रहेको र त्यहाँ मानिस बस्ने व्यवस्था भएको बताएका छन्।

‘त्यहाँभित्र अझै मानिस जीवितै हुन सक्ने आशा छ। सरकारले प्रविधि छैन भनेर हात उठाएर बस्न मिल्दैन,’ उनले भनिन्।

सरकारले राहत वितरणका लागि अपनाएको एकद्वार प्रणालीका कारण प्रभावितले समयमै खाद्यान्न तथा आवश्यक सामग्री पाउन नसकेको बरालको आरोप छ। विपद्मा परेका नागरिकलाई राहत पुर्‍याउने नाममा प्रक्रियागत ढिलाइ गर्न नहुने उनले बताइन्।

‘न सास भेटिएको छ, न लास, न बस्ने बास छ,’ भन्दै उनले सरकारको ध्यान बेपत्ता नागरिकका परिवार, उद्धारको पर्खाइमा रहेका व्यक्ति र विस्थापित परिवारतर्फ केन्द्रित हुनुपर्ने बताइन्।

उनले सरकारलाई दम्भ र प्रक्रियागत जटिलता छाडेर उपलब्ध सबै स्रोत, साधन र प्रविधि परिचालन गर्दै नागरिकको जीवन बचाउने अभियानमा लाग्न आग्रह गरिन्।