काठमाडौं । रसुवामा विनाशकारी बाढी आएको आठ दिनपछि सुरुङभित्र प्रवेश गर्ने मुख्य ‘इन्ट्री प्वाइन्ट’ फेला परेको छ। उद्धार, खोजी तथा राहतमा खटिएको सुरक्षाकर्मीको टोलीले बिहीबार सुरुङमार्गको प्रवेशद्वार पत्ता लगाएको हो।

भदौ १० गते भोटेकोशी नदीमा आएको भीषण बाढीले सुरुङको प्रवेशद्वार नै थुनिएपछि भित्र फसेका नागरिकसम्म उद्धार टोली पुग्न सकेको थिएन। सुरुङभित्र सयौं जना फसेको आशंका गरिए पनि प्रवेश गर्ने बाटो पत्ता नलाग्दा उद्धार अभियान अघि बढाउन कठिनाइ भइरहेको थियो।

प्रवेशद्वारको खोजीमा भएको ढिलाइप्रति नागरिकस्तरबाट समेत सरकारमाथि दबाब बढ्दै आएको थियो। सुरुङभित्र मानिस जीवितै रहेको सम्भावना हुँदाहुँदै समयमै उद्धार हुन नसके उनीहरूको ज्यान जोखिममा पर्न सक्ने भन्दै तत्काल खोजी तीव्र बनाउन माग हुँदै आएको थियो।

अब प्रवेशद्वार फेला परेसँगै सुरुङभित्र फसेका व्यक्तिको उद्धार गर्न बाटो खुलेको छ। घटनापछि निराश बनेका परिवारमा समेत आफ्ना आफन्त जीवितै उद्धार हुने आशा पलाएको छ।

उद्धार टोलीले अब सुरुङभित्रको अवस्था पहिचान गरी फसेका नागरिकसम्म पुग्ने प्रयास अघि बढाउने तयारी गरेको छ।