काठमाडौं। पृथ्वी राजमार्गको कृष्णभिर खण्ड बन्द भएपछि काठमाडौंको इन्धन आपूर्ति रोक्न नदिन नेपाल आयल निगमले वैकल्पिक बाटो समातेको छ।

निगमले त्रिभुवन राजपथ अर्थात् बाइरोडबाट पेट्रोलियम पदार्थ र एलपी ग्यास काठमाडौं ल्याइरहेको जनाएको छ।

भदौ १४ गते त्रिशूली नदीको कटानले पृथ्वी राजमार्ग भत्किएपछि इन्धन बोकेका ट्यांकर र ग्यास बुलेट बाटोमै रोकिएका थिए। त्यसपछि तराईका उद्योगमा भरिएका ग्यास सिलिन्डर बाइरोड हुँदै उपत्यका ल्याउन थालिएको हो।

निगमका अनुसार भदौ १८ गते करिब २४ हजार ५ सय र १९ गते ३४ हजार १ सय ३४ सिलिन्डर काठमाडौं भित्रिएका छन्। सडक अवरोधका बीच पनि आपूर्ति व्यवस्थालाई चलायमान राख्न वैकल्पिक मार्ग प्रयोग गरिएको निगमको भनाइ छ।

भोटेकोशी बाढीपछि रसुवा, नुवाकोट, धादिङ, गोरखा र चितवनलगायत क्षेत्रमा जारी उद्धार अभियानलाई पनि निगमले इन्धन र ग्यास उपलब्ध गराइरहेको छ।

उद्धारमा प्रयोग भइरहेका हेलिकप्टरका लागि नुवाकोटस्थित नेपाली सेनाको ब्यारेकबाट मात्रै हालसम्म १ लाख २० हजार लिटर हवाई इन्धन रिफ्युलिङ गरिएको छ।

त्यस्तै, राष्ट्रिय विपद् जोखिम न्यूनीकरण तथा व्यवस्थापन प्राधिकरणको अनुरोधमा रसुवा र नुवाकोटका अस्थायी शिविरका लागि ५ सय ७५ थान एलपी ग्यास सिलिन्डर पठाइएको निगमले जनाएको छ।

सडक भत्किँदा आपूर्ति प्रणालीमा दबाब बढे पनि निगमले वैकल्पिक बाटोबाट इन्धन र ग्यासको प्रवाह कायम राखेको छ।