काठमाडौं। गृहमन्त्री सुधन गुरूङले पृथ्वीनारायण शाहकाे तस्बिर गृह मन्त्रालयस्थित आफ्नाे कार्यकक्षमा राखेका छन् ।

राजतन्त्रको अन्त्य भएर गणतन्त्र स्थापनापछि कुनै पनि मन्त्रालयमा पूर्वराजाहरूकाे तस्बिर राख्ने गरिएको थिएन । बरू, भएकाहरू पनि हटाइएकाे थियाे । तर, शंकास्पद रूपमा गृहमन्त्री गुरूङले पृथ्वीनारायण शाहकाे तस्बिर राखेका हुन् ।

प्रधानमन्त्री बालेनलाई राजतन्त्रतिर झुकाव राख्ने नेता भनेर कतिपयले चर्चामा ल्याउँदा उनकाे सरकारका गृहमन्त्री गुरूङले राजतन्त्रकाे जग हाल्ने पृथ्वीनारायण शाहकाे तस्बिर मन्त्रालयमा झुण्ड्याउँदा गणतन्त्र पक्षधरहरूले आलोचना गर्न थालेका छन् ।

यससँगै गृहमन्त्री गुरूङकाे नियतमा प्रश्न उठेकाे छ । गत साउनकाे दाेस्रो साता उनलाई संयुक्त हिन्दु माेर्चाले नेपालमा हिन्दु राष्ट्र पुनःस्थापना गर्नुपर्ने भन्दै मागपत्र बुझाएकाे थियाे । भनिन्छ, गृहमन्त्री गुरूङ त्यसमा सहमत छन् । तर, मागपत्रमा रहेकाे हिन्दु राष्ट्रसम्बन्धी माग बुझाएको र गृहमन्त्री गुरूङले बुझेकाे विषयलाई लिएर चाैतर्फी विराेध भयाे ।

तर, यतिबेला देशवासी भाेटेकाेशी–त्रिशूली बाढीले दु:खमा छँदा गृहमन्त्री गुरूङले माैका छाेपेर राजतन्त्रलाई संस्थागत गर्ने पृथ्वीनारायण शाहकाे तस्बिर भित्तामा झुन्ड्याएका हुन् ।

दुई महिनाअघि मधेशकेन्द्रित दलहरूका नेताहरूले ‘राजा फर्काउन खाेजेकाे हाे ?’ भनेर साेध्दा प्रधानमन्त्री बालेनले ‘हाेइन’ भनेका थिए । तर, उनका गृहमन्त्री गुरूङ भने देशलाई हिन्दु राष्ट्र बनाउन र राजा फर्काउने गतिविधिमा संलग्न हुँदै गएका छन् ।

यस्तै, गुरूङले गत वर्षकाे २३ र २४ भदौमा भएको जेनजी विद्राेहमा घाइते भएका युवककाे भाइरल जुत्ताकाे तस्बिर पनि राखेका छन्।