कञ्चनपुर । नेपाली कांग्रेसका नेता रमेश लेखकले पार्टीको महाधिवेशन प्रक्रिया तत्काल नरोके कांग्रेस विभाजनबाट जोगाउन कठिन हुने चेतावनी दिएका छन् ।

कञ्चनपुरको दोधारा–चाँदनीमा कार्यकर्तासँगको भेटमा लेखकले पार्टी एकता जोगाउन आफूहरू अझै अधिकतम लचकताका साथ अघि बढिरहेको बताए । उनका अनुसार विशेष महाधिवेशनबाट १४औँ महाधिवेशनबाट बनेको कार्यसमिति हटाइएपछि अहिलेको विवाद गहिरिएको हो ।

लेखकले विशेष महाधिवेशनबाट बनेको संरचना र १४औँ महाधिवेशनबाट निर्वाचित कार्यसमितिलाई समेटेर विवाद समाधान गर्नुपर्ने प्रस्ताव अघि सारेका छन् । उनका अनुसार सभापति गगन थापालाई हटाउने आफूहरूको माग नभई विशेष महाधिवेशनमा समेटिन नसकेका १४औँ महाधिवेशनका नेताहरूलाई केन्द्रीय कार्यसमितिमा समावेश गरेर पार्टी मिलाउन सकिने विकल्प दिइएको हो ।

कार्यसमितिमा सदस्य थपिँदा सभापति थापा अल्पमतमा पर्ने अवस्था आए आफ्नो पक्षबाट पनि आवश्यक सदस्य थपेर बहुमत कायम गर्न सकिने विकल्पसमेत आफूहरूले दिएको लेखकले बताए ।

निर्वाचन समिति, क्रियाशील सदस्यता छानबिन समिति र अनुशासन समितिमा सभापतिले संयोजक तोक्न र आफ्नो पक्षका सदस्य राख्न पाउने भए पनि अन्य समूहबाट कम्तीमा एक–एक जना प्रतिनिधि राखेर अघि बढ्नुपर्ने प्रस्ताव रहेको उनको भनाइ छ ।

‘हामीले गगनजीलाई नै सभापति मान्ने गरी पार्टी मिलाउने प्रयास गरेका हौँ, तर मिल्न सकिरहेको छैन,’ लेखकले भने ।

उनले पार्टी एकताका लागि करिब ११ महिनादेखि निरन्तर प्रयास भइरहेको दाबी गर्दै अझै सहमतिको सम्भावना रहेको बताए । तर त्यसका लागि दुवै पक्षले तत्काल महाधिवेशन प्रक्रिया रोक्नुपर्ने उनको जोड छ ।

‘अहिले पनि उपाय छ । आफ्नो–आफ्नो ठाउँबाट महाधिवेशन रोकौँ । यदि महाधिवेशन रोकिएन भने पार्टी विभाजन हुन्छ,’ लेखकले भने ।

लेखकले आधिकारिकतासम्बन्धी मुख्य विवाद अदालतमा विचाराधीन रहेकाले अदालतको एउटा फैसला आफ्नो पक्षमा आएको आधारमा मात्र सम्पूर्ण विवाद टुंगिएको मान्न नहुने बताए । उनले अदालतको फैसला कुरेर त्यसपछि अघि बढ्नु उपयुक्त हुने धारणा राखे ।

महाधिवेशन प्रक्रिया नरोकिएर पार्टी विभाजनको अवस्था आए त्यसको जिम्मेवारी महाधिवेशन प्रक्रिया अघि बढाउने पक्षले लिनुपर्ने चेतावनीसमेत लेखकले दिएका छन् ।

उनका अनुसार अहिले महाधिवेशन रोक्नु नै कांग्रेसलाई विभाजनबाट जोगाउने अन्तिम विकल्प हो ।