हेटौंडा। मकवानपुरको हेटौंडाबाट ३८ ग्राम ब्राउन सुगरसहित तीन जना पक्राउ परेका छन्।

पक्राउ पर्नेमा हेटौंडा उपमहानगरपालिका–१२ बस्ने २४ वर्षीय अभिषेक भ्लोन, मनहरी गाउँपालिका–३, डोढे बस्ने २४ वर्षीय आशिष घलान र २७ वर्षीय विमल सुनार रहेका छन्।

उनीहरूलाई हेटौंडा उपमहानगरपालिका–१५, नयाँबस्तीबाट पक्राउ गरिएको हो।

विशेष सूचनाका आधारमा खटिएको प्रहरी टोलीले पूर्व–पश्चिम सडकखण्डअन्तर्गत चुरियामाईबाट हेटौंडातर्फ आउँदै गरेको बा.प्र.०३–००३ प ७८१२ नम्बरको मोटरसाइकल रोकेर चेकजाँच गरेको थियो। सो क्रममा मोटरसाइकल चालक भ्लोन तथा मोटरसाइकलमा सवार घलान र सुनार पक्राउ परेका हुन्।

खानतलासी गर्दा उनीहरूको साथबाट प्रतिबन्धित लागुऔषध खैरो हेरोइनजस्तो देखिने पदार्थ ३८ ग्राम बरामद भएको प्रहरीले जनाएको छ।

पक्राउ परेका तीनै जनामाथि थप अनुसन्धान भइरहेको प्रहरीले जनाएको छ।