काठमाडौं। प्रधानमन्त्री वालेन्द्र शाह (बालेन) सहभागी हुने संयुक्त राष्ट्रसंघको ८१औँ महासभामा १३१ देशका राष्ट्र तथा सरकार प्रमुख सहभागी हुने भएका छन् ।

परराष्ट्र मन्त्रालयमा शुक्रबार आयोजित पत्रकार सम्मेलनमा परराष्ट्र सचिव अमृतबहादुर राईले महासभामा ८१ देशका राष्ट्रप्रमुख र ५० देशका सरकार प्रमुख सहभागी हुने जानकारी दिए ।

प्रधानमन्त्री शाहको नेतृत्वमा नेपाली उच्चस्तरीय प्रतिनिधिमण्डल महासभामा सहभागी हुनेछ । महासभाको उच्चस्तरीय बहस सेप्टेम्बर २२ देखि २८ सम्म अमेरिकाको न्युयोर्कस्थित संयुक्त राष्ट्रसंघको मुख्यालयमा हुँदैछ ।

परराष्ट्र सचिव राईका अनुसार प्रधानमन्त्री शाहले सेप्टेम्बर २४ मा महासभालाई सम्बोधन गर्ने कार्यक्रम तय भएको छ ।

नेपालमा गत वर्ष भएको जेनजी आन्दोलन, त्यसपछि सम्पन्न निर्वाचन र त्यसबाट बनेको वर्तमान सरकारका प्राथमिकता महासभामा प्रस्तुत गर्ने सरकारको तयारी छ ।

नेपालले महासभालाई अन्तर्राष्ट्रिय समुदायसँग सहयोग र सद्भाव थप मजबुत बनाउने अवसरका रूपमा उपयोग गर्ने परराष्ट्र मन्त्रालयले जनाएको छ ।

सचिव राईका अनुसार महासभामार्फत नेपालको पछिल्लो राजनीतिक परिवर्तन र वर्तमान सरकारका प्राथमिकताबारे विश्व समुदायलाई जानकारी गराउँदै अन्तर्राष्ट्रिय सहयोग निरन्तरताका लागि उच्चस्तरबाटै पहल गरिनेछ ।