काठमाडौं। नेपाली कम्युनिस्ट पार्टीकी सांसद पार्वती विकले कोठा खोजिदिने कार्यालयबाटै जातीय विभेद भएको भन्दै प्रतिनिधिसभामा प्रश्न उठाएकी छन्।

मंगलबार प्रतिनिधिसभाको आकस्मिक समयमा बोल्दै सांसद विकले केही समयदेखि माइतीघर मण्डलामा ‘सरकार कोठा खै ?’ भन्दै अनशन बसेकी दीपा नेपालीको प्रसंगसमेत उठाइन्।

उनले दलित समुदायमाथि हुने छुवाछुत र विभेदविरुद्ध संघर्ष भइरहे पनि विभेदका स्वरूप नयाँ-नयाँ ढंगबाट देखिन थालेको बताइन्।

विकले हालै एउटा निजी कोठा खोजिदिने कार्यालयले गरेको विभेदबारे आफूले जानकारी पाएको बताउँदै त्यससँग सम्बन्धित संवादको अडियो संसदमा सुनाउन खोजेकी थिइन्। उनले माइकमार्फत अडियो बजाए पनि त्यसमा भएको कुराकानी स्पष्ट सुनिन सकेन।

त्यसपछि सभामुख डोलप्रसाद अर्यालले अडियो तथा भिडियो नबजाई घटनाबारे आफ्नै शब्दमा जानकारी गराउन सांसद विकलाई आग्रह गरे।

सांसद विकले विभेदका यस्ता घटनाले पीडितको पीडा थप बढाउने भन्दै दोषीमाथि सरकारले तत्काल कारबाही गर्नुपर्ने माग गरिन्। जातीय विभेद र छुवाछुत अन्त्यका लागि कानुनी व्यवस्था प्रभावकारी रूपमा कार्यान्वयन गर्नसमेत उनले सरकारको ध्यानाकर्षण गराइन्।