काठमाडौं । नेपाली कांग्रेसका सांसद खड्गबहादुर बुढाले जाजरकोटमा बाढी र पहिरोले निम्त्याएको क्षतिप्रति सरकारको गम्भीर ध्यानाकर्षण गराएका छन्।

प्रतिनिधिसभाको मंगलबारको बैठकमा विशेष समय लिएर बोल्दै सांसद बुढाले लगातारको वर्षाका कारण जाजरकोटका विभिन्न क्षेत्रमा मानवीय तथा भौतिक संकट गहिरिँदै गएको बताए।

उनका अनुसार नलगाड नगरपालिका–१० र ११ को सीमामा पर्ने ताक्सुगाड क्षेत्र अहिले जोखिमपूर्ण बनेको छ। भदौ २९ गते ताक्सुगाड खोलामा आएको बाढीले बारेकोट–४ का २६ वर्षीय रमेश सुनारलाई बगाएर बेपत्ता बनाएको उनले सदनलाई जानकारी गराए।

यसअघि पनि सोही खोलामा आएको बाढीले नलगाड–११ का रतनबहादुर दमाईलाई बगाएर बेपत्ता बनाएको उनले बताए।

बाढीका कारण दर्जनौँ घरमा क्षति पुगेको छ भने झोलुङ्गे पुल तथा अस्थायी कजवेहरू पनि बगेका छन्। भेरी करिडोरमा समेत ठूलो क्षति पुगेको सांसद बुढाले बताए।

रोली जिउलाको सिँचाइ नहरमा क्षति पुगेपछि किसानको धानबाली प्रभावित भएको उनको भनाइ छ।

तर भौतिक संरचनाको क्षतिभन्दा नागरिकको जीवन सुरक्षालाई प्राथमिकतामा राख्नुपर्ने उनले बताए।

‘पुल बगेपछि नागरिकहरू जोखिम मोलेर खोलाबाटै आउजाउ गर्न बाध्य छन्,’ बुढाले भने, ‘पक्की पुल निर्माणको ठेक्का लागेको वर्षौँ बितिसक्दा पनि काम सम्पन्न नहुनु नागरिकको जीवनसँग जोडिएको गम्भीर विषय हो।’

बाढी र पहिरोको जोखिम बढिरहेका बेला क्षतिग्रस्त पुल, सडक तथा अन्य पूर्वाधारको तत्काल मर्मत र पुनर्निर्माण गर्न सरकारसँग माग गर्दै उनले नागरिकको सुरक्षित आवागमन सुनिश्चित गर्न आग्रह गरेका छन्।