ओखलढुङ्गा। नेपाली कांग्रेसको १५औँ महाधिवेशन नजिकिँदै गर्दा ओखलढुङ्गा कांग्रेसमा ‘नयाँ कांग्रेसी’को चर्चा चुलिएको छ।

विगतमा कांग्रेस छाडेर अन्य राजनीतिक दलमा आबद्ध भएका केही व्यक्तिहरू महाधिवेशन लक्षित गतिविधिमा सक्रिय हुन थालेपछि लामो समयदेखि पार्टीमा क्रियाशील कांग्रेस कार्यकर्ताबीच असन्तुष्टि देखिन थालेको हो।

कांग्रेसको १४औँ महाधिवेशनमा क्षेत्रीय प्रतिनिधिसमेत रहेका गोपी दाहाल त्यसपछि पार्टी छाडेर राष्ट्रिय स्वतन्त्र पार्टी (रास्वपा) मा आबद्ध भएको र हालसम्म पनि उक्त पार्टीको सदस्यता नत्यागेको दाबी कांग्रेस वृत्तमा गरिएको छ।

तर पछिल्लो समय दाहाल कांग्रेसका गतिविधिमा सक्रिय देखिन थालेपछि उनको राजनीतिक भूमिकालाई लिएर कांग्रेसभित्रै प्रश्न उठ्न थालेको बताइन्छ।

केही कांग्रेस कार्यकर्ताले विगतमा पार्टी छाडेर अर्को दलमा आबद्ध भएका व्यक्ति महाधिवेशनको मुखमा पुनः कांग्रेसको सक्रिय राजनीतिमा देखिनुलाई अवसरवादी प्रवृत्तिका रूपमा व्याख्या गरेका छन्।

‘हिजो कांग्रेस छाडेर अर्को पार्टीको सदस्यता लिने, आज महाधिवेशनको मुखमा फेरि कांग्रेसको अब्बल नेता बन्ने ?’ भन्दै उनीहरूले प्रश्न उठाएका छन्।

कार्यकर्ताहरूले यस्तो प्रवृत्तिले वर्षौंदेखि पार्टीमा निरन्तर खटिएका नेता-कार्यकर्ताको योगदान र निष्ठालाई ओझेलमा पार्न सक्ने बताएका छन्।

महाधिवेशन नजिकिँदै गर्दा पार्टीभित्र आउने-जाने राजनीतिक प्रवृत्ति र अवसरअनुसार दल परिवर्तन गर्ने संस्कारबारे बहस सुरु भएको छ।

कांग्रेसको संगठनमा लामो समयदेखि सक्रिय रहेका कार्यकर्ताको योगदानलाई प्राथमिकता दिने कि पछिल्लो समय सक्रिय भएकालाई पनि समान अवसर दिने भन्ने विषय अब महाधिवेशनको तयारीसँगै थप पेचिलो बन्ने देखिएको छ।