बालबालिकासम्बन्धी संशोधन विधेयक समितिमा पठाउने प्रस्ताव सर्वसम्मत
Nepal One HD ५ असोज २०८३ १६:०२
काठमाडौं । प्रतिनिधिसभाले ‘बालबालिकासम्बन्धी (पहिलो संशोधन) विधेयक, २०८३’ लाई दफावार छलफलका लागि सम्बन्धित संसदीय समितिमा पठाउने प्रस्ताव सर्वसम्मतिले स्वीकृत गरेको छ।
सोमबार बसेको प्रतिनिधिसभा बैठकमा महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता वादीले विधेयकलाई दफावार छलफलका लागि समितिमा पठाइयोस् भन्ने प्रस्ताव प्रस्तुत गरेकी थिइन्।
मन्त्री वादीको प्रस्तावमाथि निर्णय गर्दै सदनले विधेयकलाई सम्बन्धित समितिमा पठाउने स्वीकृति दिएको हो।
के छ विधेयकमा ?
संशोधन विधेयकले बालबालिकाको अधिकार र संरक्षणसँग सम्बन्धित विद्यमान कानुनी व्यवस्थालाई समयअनुकूल बनाउने उद्देश्य राखेको छ।
विधेयकमा देखिएका कानुनी तथा व्यावहारिक त्रुटि सच्याउने विषय पनि समेटिएको छ।
अब सम्बन्धित संसदीय समितिले विधेयकमाथि दफावार छलफल गर्नेछ। समितिले छलफलपछि तयार पारेको प्रतिवेदन सदनमा पेस गर्नेछ।
त्यसपछि विधेयक पारित गर्ने प्रक्रिया अघि बढ्नेछ।
