काठमाडौं। काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्काले पूर्वप्रधानन्यायाधीश चोलेन्द्रशमशेर राणालाई पक्राउ नगरिएको बताएका छन्।

खड्काका अनुसार राणाको जीवनमा गम्भीर खतरा रहेको सूचना आएपछि सुरक्षाका लागि उनलाई कार्यालयमा ल्याइएको हो।

नेपाल प्रेससँग कुरा गर्दै उनले भने, ‘हामीलाई राति नै उहाँको जीवनमाथि गम्भीर खतरा आएको सूचना प्राप्त भयो। त्यसपछि सुरक्षा दिने क्रममा हामीले उहाँलाई साथमा लिएर आएका हौँ।’

खड्काले राणा अहिले पनि सुरक्षाका लागि प्रहरीसँगै रहेको बताए। उनको सुरक्षामा कुनै जोखिम नरहेको सुनिश्चित भएपछि घर पठाउने वा अन्य सुरक्षित स्थानमा राख्नेबारे निर्णय गरिने उनले जानकारी दिए।

‘उहाँजत्तिको प्रोटोकल भएको व्यक्तिलाई हामीले यत्तिकै पक्राउ गर्ने भन्ने हुँदैन। अहिले पनि सुरक्षाका लागि हामीसँगै हुनुहुन्छ। उहाँ सुरक्षित हुने सुनिश्चिततापछि घर पठाउने वा अन्यत्र सुरक्षित राख्ने भन्ने कुरा हुन्छ,’ खड्काले भने।

उनका अनुसार राणालाई पक्राउ गरिएको नभई सुरक्षा प्रयोजनका लागि साथमा ल्याइएको हो। अहिलेसम्म उनको सुरक्षासम्बन्धी अवस्थाबारे थप सूचना नआएको पनि खड्काले बताए।