काठमाडौं । दुबईबाट तेल अभिभतर्फ उडेको फ्लाइदुबईको एउटा यात्रुवाहक विमानमा दुई पाइलटबीचै झगडा भएपछि विमानलाई साउदी अरबतर्फ मोडिएको छ ।

बुधबारको यो घटनाले केहीबेर इजरायलको सुरक्षा संयन्त्रलाई समेत झस्काएको थियो । विमानबाट अपहरणको संकेत दिने ‘७५००’ आपत्कालीन कोड प्रसारण भएपछि इजरायलले लडाकु विमानसमेत तयारी अवस्थामा राखेको थियो । प्रधानमन्त्री बेन्जामिन नेतन्याहु र रक्षामन्त्री इजरायल काट्जले आकस्मिक सुरक्षा परामर्शसमेत गरेका थिए।

तर, पछि यो अपहरणको घटना नभएको स्पष्ट भएको छ । इजरायली सुरक्षा अधिकारीहरूका अनुसार विमानका दुई पाइलटबीच भएको उग्र विवादका कारण अवस्था असामान्य बनेको थियो। त्यसक्रममा आपत्कालीन संकेत सक्रिय भएको बताइएको छ।

उडान ट्र्याकिङ विवरणअनुसार विमान करिब ३४ हजार फिटको उचाइमा उडिरहेको अवस्थामा अचानक तीव्र रूपमा तल झरेको थियो। केही मिनेटमै विमानको उचाइ करिब १६ हजार ६ सय फिटमा पुगेपछि त्यसबाट आपत्कालीन संकेत पठाइएको थियो।

विमानमा १७४ जना यात्रु रहेको बताइएको छ। आपत्कालीन संकेत आएपछि अपहरणको आशंकामा इजरायली अधिकारीहरूले विमानको अवस्थामाथि निगरानी बढाएका थिए।

त्यसपछि विमानलाई इजरायल पुग्नुअघि नै साउदी अरबको ताबुकतर्फ डाइभर्ट गरियो। विमान त्यहाँ सुरक्षित अवतरण गरेको र यात्रु तथा चालक दलका सबै सदस्य सुरक्षित रहेको अधिकारीहरूले बताएका छन्।

घटनाको कारण पाइलटहरूबीचको विवाद भए पनि उनीहरूबीच के विषयमा झडप भयो भन्ने विवरण भने सार्वजनिक गरिएको छैन।

घटनाका कारण केही समय बेन गुरियन विमानस्थलको उडान व्यवस्थापनमा समेत सतर्कता बढाइएको थियो। प्रारम्भिक रूपमा अपहरणको आशंका गरिए पनि विमान सुरक्षित अवतरण गरेपछि त्यस्तो खतरा नरहेको पुष्टि भएको हो।

फ्लाइदुबईको यो घटनाले विमानभित्रै चालक दलबीच उत्पन्न विवादले कसरी अन्तर्राष्ट्रिय सुरक्षा संयन्त्रलाई केहीबेर उच्च सतर्कतामा पुर्‍याउन सक्छ भन्ने देखाएको छ।