प्रधानमन्त्री बालेन्द्र शाहको सचिवालयमा नियुक्त २५ जना सल्लाहकार तथा कर्मचारीको पद, जिम्मेवारी र सेवासुविधाको विवरण सार्वजनिक भएको छ।

प्रधानमन्त्री तथा मन्त्रिपरिषद्को कार्यालयले सार्वजनिक गरेको विवरणमा तीन जनाले मन्त्रीसरह र दुई जनाले राज्यमन्त्रीसरहको सुविधा पाउने उल्लेख छ।

प्रधानमन्त्रीका मुख्य सल्लाहकार कुमार ब्यञ्जनकार, राजनीतिक सल्लाहकार असिम शाह र स्वास्थ्य सल्लाहकार प्रा. डा. जगदीशप्रसाद अग्रवालले मन्त्रीसरहको सुविधा पाउनेछन्। अग्रवाल अवैतनिक स्वास्थ्य सल्लाहकार हुन्। नीति, प्रशासन तथा सुशासन सल्लाहकार सुदीप ढकाल र सूचना तथा सञ्चार प्रविधि सल्लाहकार विवेक मिश्रलाई राज्यमन्त्रीसरहको सुविधा तोकिएको छ।

प्रधानमन्त्रीका प्रमुख स्वकीय सचिव सुवाष शर्माले राजपत्राङ्कित विशिष्ट श्रेणीसरहको सुविधा पाएका छन्। स्वकीय सचिव नवीन भण्डारी, विकास परियोजनासम्बन्धी स्वकीय सहसचिव सञ्जीव पाण्डे, प्रेस तथा अनुसन्धान विज्ञ दीपा दाहाल, कार्यक्रम तथा भ्रमण संयोजक सन्तोष गिरी र सामाजिक विकास विज्ञ विश्व राईलाई राजपत्राङ्कित प्रथम श्रेणी अर्थात् सहसचिवसरहको सुविधा दिइएको छ।

त्यस्तै, प्रकृति ढकाल, विशाल अधिकारी, नागरिक उड्डयनसम्बन्धी सहायक विज्ञ सुमन गौतम, भाषा तथा मस्यौदा सहायक विज्ञ रवि किरण अधिकारी र विनय शाक्यले उपसचिवसरहको सुविधा पाएका छन्।

स्वकीय शाखा अधिकृत तथा प्रेस सहजकर्ता सुरेन्द्र बजगाई, ग्राफिक्स डिजाइनर रोशन तामाङ, स्वकीय शाखा अधिकृत बेदानन्द जोशी र अनुसन्धान अधिकृत हेमनारायणदास चौधरीलाई शाखा अधिकृतसरहको सुविधा दिइएको छ।

त्यसैगरी प्रशासन सहायक अनुप थापा मगर, ऋषि थापा, राजकुमार गौतम र बेनिस कार्की तथा कम्प्युटर सहायक एवं भिडियोग्राफर अमृत पाण्डेले राजपत्र अनङ्कित प्रथम श्रेणीसरहको सुविधा पाउनेछन्।

प्रधानमन्त्री कार्यालयले सार्वजनिक गरेको विवरणले सचिवालयमा कार्यरत व्यक्तिहरूको जिम्मेवारी र उनीहरूले पाउने सरकारी सेवासुविधाको तह स्पष्ट पारेको छ।