काठमाडौं । नेपाली कांग्रेसका सभापति गगनकुमार थापाका प्रमुख राजनीतिक सल्लाहकार प्रताप पौडेल १५औँ महाधिवेशनका लागि बागलुङ क्षेत्र नम्बर १ बाट महाधिवेशन प्रतिनिधिमा निर्विरोध चयन भएका छन्।

खुलातर्फबाट उम्मेदवारी दिएका पौडेल सर्वसम्मत रूपमा प्रतिनिधि चयन भएका हुन्। कांग्रेसको १५औँ महाधिवेशन व्यवस्थापनका लागि गठित केन्द्रीय निर्देशन समितिमा पनि पौडेल सदस्य–सचिवको जिम्मेवारीमा छन्।

बागलुङ नगरपालिका–१३ पैयुँपाटाका पौडेल विद्यार्थी जीवनदेखि नै कांग्रेस राजनीतिमा सक्रिय रहँदै आएका छन्। धौलागिरि बहुमुखी क्याम्पस बागलुङको विद्यार्थी राजनीतिदेखि नेपाल विद्यार्थी संघको जिल्ला तथा त्रिभुवन विश्वविद्यालयस्तरीय गतिविधिमा उनले भूमिका निर्वाह गरेका थिए।

पछिल्लो दुई दशकदेखि थापाको राजनीतिक तथा नीतिगत टिममा रहेर काम गर्दै आएका पौडेल सार्वजनिक नीति, संविधान तथा संसदीय मामिलामा पनि सक्रिय छन्। थापा स्वास्थ्य तथा जनसंख्यामन्त्री हुँदा उनले प्रमुख सल्लाहकारका रूपमा काम गरेका थिए।

स्वास्थ्य नीति, स्वास्थ्य प्रणाली, स्वास्थ्य बीमा, जनशक्ति व्यवस्थापन तथा स्वास्थ्यसम्बन्धी कानुन निर्माणका विषयमा पौडेलले काम गरेको बताइएको छ। कांग्रेसका विभिन्न निर्वाचन घोषणापत्र तथा पार्टीको नीति र विधान मस्यौदा निर्माणमा समेत उनी संलग्न रहँदै आएका छन्।

पौडेलले गगन थापासँग सहलेखनमा संविधानसभा र नेपाली कांग्रेसलगायत पुस्तकसमेत लेखेका छन्। विभिन्न संसदीय समिति तथा सरकारका नीति र कानुन तर्जुमा कार्यदलमा विज्ञका रूपमा समेत काम गरेको उनको अनुभव छ।

महाधिवेशन प्रतिनिधिमा निर्विरोध चयन भएपछि अब पौडेलले बागलुङ क्षेत्र नम्बर १ बाट कांग्रेसको १५औँ महाधिवेशनमा सहभागिता जनाउनेछन्।