काठमाडौं । श्रम संस्कृति पार्टीका सांसद ध्रुवराज राईले प्रतिनिधिसभाको बर्खे अधिवेशनमा जनताका तर्फबाट उठाएका प्रश्नको अपेक्षित जवाफ नपाएको बताएका छन्।

शुक्रबार प्रतिनिधिसभाको बैठकमा बोल्दै राईले यसलाई नकारात्मक रूपमा नलिन आग्रह गर्दै सरकार र सत्तापक्षलाई व्यंग्यात्मक शैलीमा शुभकामना दिए।

उनले अर्को वर्ष अधिवेशनमा आउँदा सरकारलाई अझै राम्रो काम गरेको देख्न पाइयोस् भन्ने आशय व्यक्त गरे। ‘देउसेले भनेजस्तै यो वर्ष यस्तै भयो, अर्को वर्ष आउँदा सुनको छानो भनेर आशीर्वाद दिनुपर्ने अवस्था आओस्’ भन्ने उनको भनाइ थियो।

राईले सरकारलाई प्रतिपक्षलाई सही ढंगले अघि बढाउने वातावरण बनाउन पनि आग्रह गरे।

उनले विगतमा नेपाली कांग्रेस र माओवादीले बहुमत प्राप्त गरेको प्रसंग जोड्दै अहिले राष्ट्रिय स्वतन्त्र पार्टी बलियो शक्तिका रूपमा आएको उल्लेख गरे। यस्तो अवस्थामा सरकार र सत्ता टिकाउनु चुनौतीपूर्ण हुने संकेत गर्दै उनले सावधानी अपनाउन आग्रह गरे।

‘नेपाललाई सतीले सरापेको देश भनिन्छ, जोगिनुहोला,’ उनले भने, ‘सत्ता र सरकार जोगाएर पाँच वर्ष टिकाउनुभयो भने जनताले आशा गरेजस्तो हुनेछ। सदनबाट शुभकामना दिन चाहन्छु।’