काठमाडौं । राष्ट्रपति रामचन्द्र पौडेल र सभामुख डोलप्रसाद अर्यालबीच शुक्रबार शिष्टाचार भेटवार्ता भएको छ।

राष्ट्रपति भवन शीतल निवासमा भएको भेटमा सभामुख अर्यालले अन्तरव्यवस्थापिका सङ्घ (आइपीयू) को १५३औँ महासभामा सहभागी हुन आफू आइतबार प्रस्थान गर्न लागेको जानकारी गराएका छन्।

सभामुखको सचिवालयका अनुसार भेटमा महासभामा नेपालको सहभागिता र प्रतिनिधित्वका विषयमा पनि छलफल भएको थियो।

अन्तरव्यवस्थापिका सङ्घको महासभा विभिन्न देशका संसद्बीच संवाद, सहकार्य र साझा विषयमा छलफल गर्ने अन्तर्राष्ट्रिय मञ्च हो।

नेपालको प्रतिनिधिमण्डलले महासभामा सहभागिता जनाउने तयारी गरेको छ।