काठमाण्डौ। नेपाली काँग्रेसका नेता तथा प्रतिनिधि सभा सदस्य नरेन्द्रकुमार केरुङले केन्द्रीय सदस्य पदमा उम्मेद्धारी दिने घोषणा गरेका छन् ।

बिशेष महाधिबेशनबाट केन्द्रीय सदस्यमा चयन भएका केरुङले १५ औँ महाधिबेशनमा कोशी प्रदेशबाट भूगोल तर्फ केन्द्रीय सदस्यको उम्मेद्धार बन्ने घोषणा गरेका हुन् ।

कुसल संगठक, प्रष्ट बक्ता र बौद्धिक नेताको छवी बनाएका केरुङले यसअघि काँग्रेस पाँचथरको दुई कार्यकाल सभापति भएर पार्टीको नेतृत्व गरिसकेका छन् ।

उनको राजनीति नेपाल विद्यार्थी संघबाट सुरु भएको थियो । २०४८ सालमा नेविसंघ जिल्ला सचिवको जिम्मेवारी सम्हालेपछि उनी क्रमशः शिक्षक र प्राध्यापकहरूको संगठनमार्फत सक्रिय राजनीतिमा स्थापित भएका नेता हुन् ।

२०५१ सालमा नेपाल शिक्षक संघको जिल्ला सह–सचिव बनेका केरुङ २०५७ देखि २०६७ सालसम्म ट्रेड युनियन कांग्रेस पाँचथरको सभापतिको भूमिकामा थिए ।

२०५५ देखि २०६७ सालसम्म पाँचथर बहुमुखी क्याम्पसमा प्राध्यापकको भूमिकामा रहेका केरुङ २०६७ सालदेखि पूर्णकालिन राजनीतिमा होमिएका थिए ।

कम उमेरमै जिल्ला सभापतिको जिम्मेवारी सम्हालेका केरुङले लगातार दुई कार्यकाल, २०७८ सालसम्म पाँचथर काँग्रेसको नेतृत्व सम्हालेका हुन् ।

व्यवस्थापन सकायमा स्नातकोत्तरसम्म अध्ययन गरेका केरुङले बौद्धिक व्यक्तित्वको परिचय बनाएका छन् ।

जिल्ला स्तरको लामो राजनीतिक अनुभवलाई अब केन्द्रीय राजनीतिमा परिणत गरेर देशको सेवामा समर्पित हुने केरुङको भनाई छ।